|| ಶ್ರೀ॒ ಗು॒ರು॒ಭ್ಯೋ॒ ನ॒ಮಃ॒ ಹರಿಃ ಓಂ ||


For any questions, suggestions or participation in the project, contact Dayananda Aithal at dithal29@gmail.com
[Last updated on: 03-Jun-2025]

[1] [ಋಗ್ವೇದ ಮಂಡಲ ೧, ೫೦ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೧, ಅಧ್ಯಾಯ ೪, ೮ ವರ್ಗಾನಂತರಂ]
ಶ॒ನೈಶ್ಚಿ॑ದದ್ಯ ಸೂರ್‍ಯೇಣಾಽಽದಿ॒ತ್ಯೇನ॒ ಸಹೀ᳚ಯಸಾ |

ಅ॒ಹಂ ಯಶ॑ಸ್ವಿನಾಂ॒ ಯಶೋ᳚ ವಿ॒ದ್ಯಾರೂ᳚ಪಮು॒ಪಾ ದ॑ದೇ ||1||

ಉ॒ದ್ಯನ್ನ॒ದ್ಯ ವಿ ನೋ᳚ ಭಜ ಪಿ॒ತಾ ಪು॒ತ್ರೇಭ್ಯೋ॒ ಯಥಾ᳚ |

ದೀ॒ರ್ಘಾ॒ಯು॒ತ್ವಸ್ಯ॒ ಹೇಶಿ॑ಷೇ॒ ತಸ್ಯ॑ ನೋ ಧೇಹಿ ಸೂರ್‍ಯ ||2||

ಉ॒ದ್ಯಂತಂ᳚ ತ್ವಾ ಮಿತ್ರಮಹ ಆ॒ರೋಹಂ᳚ತಂ ವಿಚಕ್ಷಣ |

ಪಶ್ಯೇ᳚ಮ ಶ॒ರದಃ॑ ಶ॒ತಂ ಜೀವೇ᳚ಮ ಶ॒ರದಃ॑ ಶ॒ತಂ ||3||

[2] [ಋಗ್ವೇದ ಮಂಡಲ ೧, ೧೯೧ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೨, ಅಧ್ಯಾಯ ೫, ೧೬ ವರ್ಗಾನಂತರಂ] ವಿಷಘ್ನಸೂಕ್ತಂ
ಮಾ ಬಿ॑ಭೇ॒ರ್‍ನ ಮ॑ರಿಷ್ಯಸಿ॒ ಪರಿ॑ ತ್ವಾ ಪಾಮಿ ಸ॒ರ್‍ವತಃ॑ |

ಘ॒ನೇನ॒ ಹನ್ಮಿ॒ ವೃಶ್ಚಿ॑ಕ॒ಮಹಿಂ᳚ ದಂ॒ಡೇನಾಗ॑ತಂ ||1||

ಆ॒ದಿ॒ತ್ಯರಥ॒ವೇಗೇ᳚ನ ವಿ॒ಷ್ಣುಬಾ᳚ಹುಬ॒ಲೇನ॑ ಚ |

ಗ॒ರುಡ॑ಪ॒ಕ್ಷನಿ॑ಪಾತೇ॒ನ ಭೂ॒ಮಿಂ ಗ॑ಚ್ಛ ಮ॒ಹಾಯ॑ಶಾಃ ||2||

ಗ॒ರುಡ॑ಸ್ಯ॒ ಪಾತ॑ಮಾತ್ರೇ॒ಣ ತ್ರ॒ಯೋ ಲೋ᳚ಕಾಃ ಪ್ರ॒ಕಂಪಿ॑ತಾಃ |

ಪ್ರ॒ಕಂಪಿ॒ತಾ ಮ॒ಹೀ ಸರ್‍ವಾ᳚ ಸ॒ಶೈಲ॑ವನ॒ಕಾನ॑ನಾ ||3||

ಗ॒ಗನಂ॒ ನಷ್ಟ॑ಚಂದ್ರಾ॒ರ್ಕಂ ಜ್ಯೋ॒ತಿಷಂ᳚ ನ ಪ್ರ॒ಕಾಶ॑ತೇ |

ದೇ॒ವತಾ॒ ಭಯ॑ಭೀತಾ॒ಶ್ಚ ಮಾ॒ರುತೋ᳚ ನ ಪ್ಲ॒ವಾಯ॑ತಿ |

ಮಾ॒ರುತೋ᳚ ನ ಪ್ಲ॒ವಾಯ॒ತ್ಯೋಂ ನಮಃ॑ ||4||

ಭೋ ಸ॒ರ್ಪಭ॑ದ್ರ ಭ॒ದ್ರಂ ತೇ᳚ ದೂ॒ರಂ ಗ॑ಚ್ಛ ಮ॒ಹಾವಿಷ |

ಜ॒ನ್ಮೇ᳚ಜ॒ಯಸ್ಯ॑ ಯಜ್ಞಾಂ॒ತೇ, ಆ॒ಸ್ತೀಕ॑ವಚ॒ನಂ ಸ್ಮ॑ರ ||5||

ಆ॒ಸ್ತೀಕ॒ವಚ॑ನಂ॒ ಶ್ರುತ್ವಾ᳚ ಯಃ॒ ಸರ್ಪೋ᳚ ನ ನಿ॒ವರ್‍ತ॑ತೇ |

ಶತ॑ಧಾ॒ ಭಿದ್ಯ॑ತೇ ಮೂ॒ರ್ಧ್ನಿ ಶಿಂ॒ಶವೃ॑ಕ್ಷಫ॒ಲಂ ಯ॑ಥಾ ||6||

ನ॒ರ್ಮದಾ॒ಯೈ ನ॑ಮಃ ಪ್ರಾ॒ತರ್‍ನ॒ರ್ಮದಾ᳚ಯೈ ನ॒ಮೋ ನಿ॑ಶಿ |

ನಮೋ᳚ಽಸ್ತು॒ ನರ್ಮ॑ದೇ ತು॒ಭ್ಯಂ ತ್ರಾ॒ಹಿ ಮಾಂ᳚ ವಿಷ॒ಸರ್ಪ॑ತಃ ||7||

ಯೋ ಜ॑ರ॒ತ್ಕಾರು॑ಣಾ ಜಾ॒ತೋ ಜ॒ರತ್ಕಾ᳚ರ್ವಾಂ ಮ॒ಹಾಯ॑ಶಾಃ |

ತಸ್ಯ॑ ಸ್ಮ॒ರಾಭಿ॑ ಭದ್ರಂ॒ ತೇ ದೂ॒ರಂ ಗ॑ಚ್ಛ ಮ॒ಹಾವಿಷ ||8||

ಅಸಿ॑ತಿಂ॒ ಚಾರ್‍ಥ॑ಸಿದ್ಧಿಂ॒ ಚ ಸುನೀತಿಂ᳚ ಚಾಪಿ॑ ಯಃ ಸ್ಮ॑ರೇತ್ |

ದಿ॒ವಾ ವಾ॒ ಯದಿ॑ ವಾ ರಾ॒ತ್ರೌ ನಾ॒ಸ್ತಿ ಸರ್ಪ॑ಭಯಂ॒ ಭವೇತ್ ||9||

ಅಗ॑ಸ್ತಿ॒ರ್ಮಾಧ॑ವಶ್ಚೈ॒ವ ಮು॒ಚುಕುಂ᳚ದೋ ಮ॒ಹಾಮು॑ನಿಃ |

ಕಪಿ॑ಲೋ॒ ಮುನಿ॑ರಾಸ್ತೀ॒ಕಃ ಪಂ॒ಚೈತೇ᳚ ಸುಖ॒ಶಾಯಿ॑ನಃ ||10||

[3] ಋಷಿಃ: ಹಿರಣ್ಯಗರ್ಭಃ ದೇವತಾ: ೧೨:ಕುಹೂಃ, ೩೪:ಅನುಮತಿಃ, ೫೮:ಧಾತಾ ಛಂದಃ: ೧,೨,೬,೮:ತ್ರಿಷ್ಟುಪ್, ೫:ಗಾಯತ್ರಿ, ೩,೪,೭:ಅನುಷ್ಟುಪ್ [ಋಗ್ವೇದ ಮಂಡಲ ೨, ೩೨ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೨, ಅಧ್ಯಾಯ ೭, ೧೫ ವರ್ಗಾನಂತರಂ]
ಕು॒ಹೂಮ॒ಹಂ ಸು॒ವೃತಂ᳚ ವಿದ್ಮ॒ನಾಪ॑ಸಮ॒ಸ್ಮಿನ್‌ ಯ॒ಜ್ಞೇ ಸು॒ಹವಾಂ॒ ಜೋಹ॑ವೀಮಿ |

ಸಾ ನೋ᳚ ದದಾತು॒ ಶ್ರವ॑ಣಂ ಪಿತೄ॒ಣಾಂ ತಸ್ಯೈ᳚ ತೇ ದೇವಿ ಹ॒ವಿಷಾ᳚ ವಿಧೇಮ ||1||

ಕು॒ಹೂರ್ದೇ॒ವಾನಾ᳚ಮ॒ಮೃತ॑ಸ್ಯ॒ ಪತ್ನೀ᳚ ಹ॒ವ್ಯಾ ನೋ᳚, ಅ॒ಸ್ಯ ಹ॒ವಿಷಃ॑ ಶೃಣೋತು |

ಸಂ ದಾ॒ಶುಷೇ᳚ ಕಿರತು॒ ಭೂರಿ॑ ವಾ॒ಮಂ ರಾ॒ಯಸ್ಪೋಷಂ॒ ಯಜ॑ಮಾನೇ ದಧಾತು ||2||

ಅನು॑ ನೋ॒ಽದ್ಯಾನು॑ಮತಿರ್‍ಯ॒ಜ್ಞಂ ದೇ॒ವೇಷು॑ ಮನ್ಯತಾಂ |

ಅ॒ಗ್ನಿಶ್ಚ॑ ಹವ್ಯ॒ವಾಹ॑ನೋ॒ ಭವ॑ತಂ ದಾ॒ಶುಷೇ॒ ಮಯಃ॑ ||3||

ಅ॒ನ್ವಿದ॑ನುಮತೇ॒ ತ್ವಂ ಮನ್ಯಾ᳚ಸೈ॒ ಶಂ ಚ॑ ನಸ್ಕೃಧಿ |

ಕ್ರತ್ವೇ॒ ದಕ್ಷಾ᳚ಯ ನೋ ಹಿನು॒ ಪ್ರ ಣ॒ ಆಯೂಂ᳚ಷಿ ತಾರಿಷತ್ ||4||

ಧಾ॒ತಾ ದ॑ದಾತು ನೋ ರ॒ಯಿಮೀಶಾ᳚ನೋ॒ ಜಗ॑ತ॒ಸ್ಪತಿಃ॑ |

ಸ ನಃ॑ ಪೂ॒ರ್ಣೇನ॑ ವಾವನತ್ ||5||

ಧಾ॒ತಾ ದ॑ದಾತು ದಾ॒ಶುಷೇ॒ ವಸೂ᳚ನಿ ಪ್ರ॒ಜಾಕಾ᳚ಮಾಯ ಮೀ॒ಳ್ಹುಷೇ᳚ ದುರೋ॒ಣೇ |

ತಸ್ಮೈ᳚ ದೇ॒ವಾ, ಅ॒ಮೃತಾಃ॒ ಸಂ ವ್ಯ॑ಯಂತಾಂ॒ ವಿಶ್ವೇ᳚ ದೇ॒ವಾಸೋ॒, ಅದಿ॑ತಿಃ ಸ॒ಜೋಷಾಃ᳚ ||6||

ಧಾ॒ತಾ ದ॑ದಾತು ದಾ॒ಶುಷೇ॒ ಪ್ರಾಚೀಂ॒ ಜೀ॒ವಾತು॒ಮಕ್ಷಿ॑ತಾಂ |

ವ॒ಯಂ ದೇ॒ವಸ್ಯ॑ ಧೀಮಹಿ ಸುಮ॒ತಿಂ ವಾ॒ಜನೀ᳚ವತಃ ||7||

ಧಾ॒ತಾ ಪ್ರ॒ಜಾನಾ᳚ಮು॒ತ ರಾ॒ಯ ಈ᳚ಶೇ ಧಾ॒ತೇದಂ ವಿಶ್ವಂ॒ ಭುವ॑ನಂ ಜಜಾನ |

ಧಾ॒ತಾ ಕೃ॒ಷ್ಟೀರನಿ॑ಮಿವಾ॒ಭಿಚ॑ಷ್ಟೇ ಧಾ॒ತ್ರ ಇದ್ಧ॒ವ್ಯಂ ಘೃ॒ತವ॑ಜ್ಜುಹೋತ ||8||

[4] [ಋಗ್ವೇದ ಮಂಡಲ ೨, ೪೩ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೨, ಅಧ್ಯಾಯ ೮, ೧೨ ವರ್ಗಾನಂತರಂ]
ಭ॒ದ್ರಂ ವ॑ದ ದಕ್ಷಿಣ॒ತೋ ಭ॒ದ್ರಮು॑ತ್ತರ॒ತೋ ವ॑ದ |

ಭ॒ದ್ರಂ ಪು॒ರಸ್ತಾ᳚ನ್ನೋ ವದ ಭ॒ದ್ರಂ ಪ॑ಶ್ಚಾತ್‌ ಕ॒ಪಿಂಜ॑ಲ ||1||

ಭ॒ದ್ರಂ ವ॑ದ ಪು॒ತ್ರೈರ್ಭ॒ದ್ರಂ ವ॑ದ ಗೃ॒ಹೇಷು॑ ಚ |

ಭ॒ದ್ರಮ॒ಸ್ಮಾಕಂ᳚ ನೋ ವದ ಭ॒ದ್ರಂ ನೋ॒, ಅಭ॑ಯಂ ವದ ||2||

ಭ॒ದ್ರಮ॒ಧಸ್ತಾ᳚ನ್ನೋ ವದ ಭ॒ದ್ರಮು॒ಪರಿ॑ಷ್ಟಾನ್ನೋ ವದ |

ಭ॒ದ್ರಂಭ॑ದ್ರಂ ನ॒ ಆ ವ॑ದ ಭ॒ದ್ರಂ ನಃ॑ ಸರ್‍ವ॒ತೋ ವ॑ದ ||3||

ಅ॒ಸ॒ಪ॒ತ್ನಃ ಪು॒ರಸ್ತಾ᳚ನ್ನಃ ಶಿ॒ವಂ ದ॑ಕ್ಷಿಣ॒ತಸ್ಕೃ॑ಧಿ |

ಅ॒ಭ॑ಯಂ॒ ಸತ॑ತಂ ಪ॒ಶ್ಚಾದ್ ಭ॒ದ್ರಮು॑ತ್ತರ॒ತೋ ಗೃ॒ಹೇ ||4||

ಯೌ॒ವನಾ᳚ನಿ ಮ॒ಹಯ॑ಸಿ ಜಿ॒ಗ್ಯುಷಾ᳚ಮಿವ॒ ದುಂದು॑ಭಿಃ |

ಶಕುಂ॑ತ॒ಕ ಪ್ರ॑ದಕ್ಷಿ॒ಣಂ ಶ॒ತಪ॑ತ್ರಾ॒ಭಿ ನೋ᳚ ವದ ||5||

ಆ॒ವದಂ॒ಸ್ತ್ವಂ ಶ॑ಕುನೇ ಭ॒ದ್ರಮಾ ವ॑ದ ತೂ॒ಷ್ಣೀಮಾಸೀ᳚ನಃ ಸುಮ॒ತಿಂ ಚಿ॑ಕಿದ್ಧಿ ನಃ |

ಯದು॒ತ್ಪ॒ತನ್‌ ವದ॑ಸಿ ಕರ್ಕ॒ರಿರ್‍ಯ॑ಥಾ ಬೃ॒ಹದ್ವ॑ದೇಮ ವಿ॒ದಥೇ᳚ ಸು॒ವೀರಾಃ᳚ ||6||

[5] [ಋಗ್ವೇದ ಮಂಡಲ ೫, ೪೪ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೪, ಅಧ್ಯಾಯ ೨, ೨೫ ವರ್ಗಾನಂತರಂ]
ಜಾ॒ಗರ್ಷಿ॒ ತ್ವಂ ಭುವ॑ನೇ ಜಾತವೇದೋ ಜಾ॒ಗರ್ಷಿ॒ ಯತ್ರ॒ ಯಜ॑ತೇ ಹ॒ವಿಷ್ಮಾ॑ನ್ |

ಇ॒ದಂ ಹ॒ವಿಃ ಶ್ರ॒ದ್ಧಧಾ᳚ನೋ ಜುಹೋಮಿ॒ ತೇನ॑ ಪಾಸಿ॒ ಗುಹ್ಯಂ॒ ನಾಮ॒ ಗೋನಾಂ᳚ ||1||

[6] [ಋಗ್ವೇದ ಮಂಡಲ ೫, ೪೯ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೪, ಅಧ್ಯಾಯ ೩, ೩ ವರ್ಗಾನಂತರಂ]
ಸೂ॒ಕ್ತಾಂತೇ॒ಽಸ್ಯೇತ್ತೃ॑ಣಾನ್ಯ॒ಗ್ನಾವಿ॒ರಿಣೇ᳚ ವೋದ॒ಕೇಽಪಿ॑ ವ [ಸೂ॒ಕ್ತಾಂತೇ᳚ತೃ॑ಣಾನ್ಯ॒ಗ್ನಾ ವರಣ್ಯೇ᳚ ವೋದ॒ಕೇಽಪಿ॑ ವ] |

ಯದ॒ಸ್ತೃಣೈ᳚ರಧೀತಂ ತತ್‌ ತೃ॒ಣಾನಿ॑ ಭವ॒ತಿ ಧ್ರುವಂ [ಯಸ್ತೃಣೈ᳚ರಧ್ಯ॒ಯನಂ॒ತ ದಧೀತಂ᳚ ಸ್ತೃ॒ಣಾನಿ॑ ಭವ॒ತೇ ಭ॑ವ] ||1||

ವಾಪೀ᳚ಕೂ॒ಪತ॑ಡಾಗಾ॒ನಾಂ ಸ॒ಮುದ್ರಂ᳚ ಗಚ್ಛ॒ ಸ್ವಾಹಾ᳚ [ಅ॒ಗ್ನಿಂ ಗ॑ಚ್ಚ॒ ಸ್ವಾಹಾ᳚] ||2||
[7] [ಋಗ್ವೇದ ಮಂಡಲ ೫, ೫೧ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೪, ಅಧ್ಯಾಯ ೩, ೭ ವರ್ಗಾನಂತರಂ]
ಸ್ವ॒ಸ್ತ್ಯಯ॑ನಂ॒ ತಾರ್ಕ್ಷ್ಯ॒ಮರಿ॑ಷ್ಟನೇಮಿಂ ಮ॒ಹದ್ಭೂ᳚ತಂ ವಾಯ॒ಸಂ ದೇ॒ವತಾ᳚ನಾಂ |

ಅ॒ಸು॒ರ॒ಘ್ನಮಿಂದ್ರ॑ಸಖಂ ಸ॒ಮತ್ಸು॑ ಬೃ॒ಹದ್ಯಶೋ॒ ನಾವ॑ಮಿ॒ವಾ ರು॑ಹೇಮ ||1||

ಅಂ॒ಹೋ॒ಮುಚ॑ಮಾಂ॒ಗಿರ॑ಸಂ॒ ಗಯಂ᳚ ಚ ಸ್ವ॒ಸ್ತ್ಯಾ᳚ತ್ರೇ॒ಯಂ ಮನ॑ಸಾ ಚ॒ ತಾರ್ಕ್ಷ್ಯಂ᳚ |

ಪ್ರಯ॑ತಪಾಣಿಃ ಶರ॒ಣಂ ಪ್ರ ಪ॑ದ್ಯೇ ಸ್ವ॒ಸ್ತಿ ಸಂ᳚ಬಾ॒ಧೇಷ್ವಭ॑ಯಂ ನೋ, ಅಸ್ತು ||2||

[8] [ಋಗ್ವೇದ ಮಂಡಲ ೫, ೮೪ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೪, ಅಧ್ಯಾಯ ೪, ೨೯ ವರ್ಗಾನಂತರಂ]
ವರ್ಷಂ᳚ತು ತೇ ವಿಭಾವರಿ ದಿ॒ವೋ, ಅ॒ಭ್ರಸ್ಯ॑ ವಿ॒ದ್ಯುತಃ॑ |

ರೋಹಂ᳚ತು॒ ಸರ್‍ವ॑ಬೀಜಾ॒ನ್ಯವ॑ ಬ್ರಹ್ಮ॒ದ್ವಿಷೋ᳚ ಜಹಿ ||1||

[9] [ಋಗ್ವೇದ ಪಂಚಮಮಂಡಲಸ್ಯಾಂತೇ][ಋಗ್ವೇದ ಅಷ್ಟಕ ೪, ಅಧ್ಯಾಯ ೪, ೩೪ ವರ್ಗಾನಂತರಂ]
ಆ ತೇ॒ ಗರ್ಭೋ॒ ಯೋನಿ॑ಮೈತು॒ ಪುಮಾ॒ನ್‌ ಬಾಣ॑ ಇ॒ವೇಷು॑ಧಿಂ |

ಆ ವೀ॒ರೋ ಜಾ᳚ಯತಾಂ ಪು॒ತ್ರಸ್ತೇ᳚ ದಶ॒ಮಾಸ್ಯಃ॑ ||1||

ಕ॒ರೋಮಿ॑ ತೇ ಪ್ರಾಜಾಪ॒ತ್ಯಮಾ ಗರ್ಭೋ॒ ಯೋನಿ॑ಮೈತು॒ ತೇ |

ಅನೂ॒ನಃ ಪೂರ್ಣೋ᳚ ಜಾಯತಾಮಶ್ಲೋ॒ಣೋಽಪಿ॑ಶಾಚಧೀ॒ತಃ ||2||

ಪುಮಾಂ᳚ಸ್ತೇ ಪು॒ತ್ರೋ ನಾರಿ॑ ತಂ ಪುಮಾ॒ನನು॑ಜಾಯತಾಂ |

ತಾನಿ॑ ಭ॒ದ್ರಾಣಿ॒ ಬೀಜಾ᳚ನ್ಯೃ॒ಷಭಾ᳚ ಜನಯಂತಿ॒ ನೌ ||3||

ಯಾನಿ॑ ಭ॒ದ್ರಾಣಿ॒ ಬೀಜಾ᳚ನ್ಯೃ॒ಷಭಾ᳚ ಜ॒ನಯಂ᳚ತಿ॒ ನಃ |

ತೈಸ್ತ್ವಂ᳚ ಪು॒ತ್ರಾನ್‌ ವಿಂ᳚ದಸ್ವ॒ ಸಾ ಪ್ರಸೂ᳚ರ್ಧೇನು॒ಕಾ ಭ॑ವ ||4||

ಕಾಮಃ॒ ಸಮೃ॑ದ್ಧ್ಯತಾಂ ಮ॒ಹ್ಯಮ॒ಪರಾ᳚ಜಿತ॒ಮೇವ॑ ಮೇ |

ಯಂ ಕಾಮಂ॒ ಕಾಮ॑ಯೇ ದೇ॒ವ ತಂ ಮೇ ವಾ᳚ಯೋ ಸ॒ಮರ್ಧ॑ಯ ||5||

[10] [ಋಗ್ವೇದ ಪಂಚಮಮಂಡಲಸ್ಯಾಂತೇ][ಋಗ್ವೇದ ಅಷ್ಟಕ ೪, ಅಧ್ಯಾಯ ೪, ೩೪ ವರ್ಗಾನಂತರಂ]
ಅ॒ಗ್ನಿರೈ᳚ತು ಪ್ರಥ॒ಮೋ ದೇ॒ವತಾ᳚ನಾಂ॒ ಸೋಽಸ್ಯೈ᳚ ಪ್ರ॒ಜಾಂ ಮುಂ᳚ಚತು॒ ಮೃತ್ಯು॑ಪಾಶಾತ್ |

ತದ॑ಯಂ॒ ರಾಜಾ॒ ವರು॒ಣೋಽನು॑ಮನ್ಯ॒ತಾಂ ಯಥೇ॒ಯಂ ಸ್ತ್ರೀ॒ ಪೌತ್ರ॑ಮಘಂ॒ ನ ರೋ᳚ದಾತ್ ||1||

ಇ॒ಮಾಮ॒ಗ್ನಿಸ್ತ್ರಾ᳚ಯತಾಂ॒ ಗಾರ್ಹ॑ಪತ್ಯಃ ಪ್ರ॒ಜಾಮ॒ಸ್ಮೈ ನ॑ಯತು ದೀ॒ರ್ಘಮಾಯುಃ॑ |

ಅ॒ಶೂ॒ನ್ಯೋಪ॑ಸ್ಥಾ॒ ಜೀವ॑ತಾಮಸ್ತು ಮಾ॒ತಾ ಪೌತ್ರ॑ಮಾನಂ॒ದಮ॒ಭಿ ಪ್ರಬು॑ದ್ಧ್ಯತಾಮಿ॒ಯಂ ||2||

ಮಾ ತೇ॒ ಗೃಹೇ॒ ನಿಶಿ॑ ಘೋಷ ಉ॒ತ್ಥಾದನ್ಯ॑ತ್ರ॒ ತ್ವದ್ರುದ॑ತ್ಯಃ॒ ಸಂ ವಿ॑ಶಂತು |

ಮಾ ತ್ವಂ॒ ವಿಕೇ᳚ಶ್ಯು॒ರ ಆವ॑ಧಿಷ್ಠಾ ಜೀ॒ವಪ॑ತ್ನೀ॒ ಪತಿ॑ಲೋ॒ಕೇ ವಿ॑ರಾಜ ಪಶ್ಯಂ᳚ತೀ ಪ್ರ॒ಜಂ ಸು॑ಮನ॒ಸ್ಯಮಾ᳚ನಾ ||3||

ಅಪ್ರ॑ಜ॒ಸ್ತಾಂ ಪೌತ್ರ॑ಮೃ॒ತ್ಯುಂ ಪಾ॒ಪ್ಮಾನ॑ಮು॒ತ ವಾ᳚ಘಂ |

ಶೀ॒ರ್ಷ್ಣಃ ಸ್ರ॒ಜಮಿ॑ವೋನ್ಮು॒ಚ್ಯ ದ್ವಿಷ॑ದ್ಭ್ಯಃ॒ ಪ್ರತಿ॑ಮುಂಚಾಮಿ ಪಾ॒ಶಂ ||4||

ದೇ॒ವಕೃ॑ತಂ ಬ್ರಾಹ್ಮ॒ಣಂ ಕ॒ಲ್ಪಮಾ᳚ನಂ॒ ತೇನ॑ ಹನ್ಮಿ ಯೋನಿ॒ಷದಃ॑ ಪಿಶಾ॒ಚಾನ್ |

ಕ್ರ॒ವ್ಯಾ॒ದೋ ಮೃ॒ತ್ಯೂನ॑ಧ॒ರಾನ್‌ ಪಾ᳚ತಯಾಮಿ ಧೀ॒ರ್ಘಮಾಯು॒ಸ್ತವ॑ ಜೀವಂತು ಪು॒ತ್ರಾಃ ||5||

[11] ಶ್ರೀಸೂಕ್ತಂ [ಆನಂದ ಕರ್ದಮ ಚಿಕ್ಲೀತಾಃ ಶ್ರೀಪುತ್ರಾಃ ಶ್ರೀರಗ್ನಿಶ್ಚ ಆದ್ಯಾಃ ತಿಸ್ರೋ, ಅನುಷ್ಟುಭಃ, ಚತುರ್‍ಥೀ ಬೃಹತೀ, ಪಂಚಮೀ ಷಷ್ಥ್ಯೌ ತ್ರಿಷ್ಟುಭೌ, ತತೋ, ಅಷ್ಟೌ ಅನುಷ್ಟುಭಃ, ಅಂತ್ಯಾ, ಆಸ್ತಾರಪಂಕ್ತಿಃ] [ಋಗ್ವೇದ ಮಂಡಲ ೫, ೮೭ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೪, ಅಧ್ಯಾಯ ೪, ೩೪ ವರ್ಗಾನಂತರಂ]
ಹಿರ᳚ಣ್ಯವರ್ಣಾಂ॒ ಹರಿ॑ಣೀಂ ಸು॒ವರ್ಣ॑ರಜ॒ತಸ್ರ॑ಜಾಂ |

ಚಂ॒ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ ||1||

ತಾಂ ಮ॒ ಆ ವ॑ಹ॒ ಜಾತವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀಂ᳚ |

ಯಸ್ಯಾಂ॒ ಹಿರ᳚ಣ್ಯಂ ವಿಂ॒ದೇಯಂ॒ ಗಾಮಶ್ವಂ॒ ಪುರು॑ಷಾನ॒ಹಂ ||2||

ಅ॒ಶ್ವ॒ಪೂ॒ರ್‍ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ᳚ದ ಪ್ರ॒ಬೋಧಿ॑ನೀಂ |

ಶ್ರಿಯಂ᳚ ದೇ॒ವೀಮುಪ॑ ಹ್ವಯೇ॒ ಶ್ರೀರ್ಮಾ᳚ ದೇ॒ವೀ ಜು॑ಷತಾಂ ||3||

ಕಾಂ॒ ಸೋ॒ಸ್ಮಿ॒ತಾಂ ಹಿರ᳚ಣ್ಯಪ್ರಾ॒ಕಾರಾ᳚ ಮಾ॒ರ್ದ್ರಾಂ ಜ್ವಲಂ᳚ತೀಂ ತೃ॒ಪ್ತಾಂ ತ॒ರ್ಪಯಂ᳚ತೀಂ |

ಪ॒ದ್ಮೇ॒ ಸ್ಥಿ॒ತಾಂ ಪ॒ದ್ಮವ᳚ರ್ಣಾಂ॒ ತಾಮಿ॒ಹೋಪ॑ ಹ್ವಯೇ॒ ಶ್ರಿಯಂ᳚ ||4||

ಚಂ॒ದ್ರಾಂ ಪ್ರ॑ಭಾ॒ಸಾಂ ಯ॒ಶಸಾ॒ ಜ್ವಲಂ᳚ತೀಂ॒ ಶ್ರಿಯಂ᳚ ಲೋ॒ಕೇ ದೇ॒ವಜು॑ಷ್ಟಾಮುದಾ॒ರಾಂ |

ತಾಂ ಪ॒ದ್ಮಿನೀ᳚ಮೀಂ॒ ಶರ॑ಣಮ॒ಹಂ ಪ್ರ ಪ॑ದ್ಯೇಽಲ॒ಕ್ಷ್ಮೀರ್ಮೇ᳚ ನಶ್ಯತಾಂ॒ ತ್ವಾಂ ವೃ॑ಣೇ ||5||[ವ:೧]

ಆ॒ದಿ॒ತ್ಯವ᳚ರ್ಣೇ॒ ತಪ॒ಸೋಽಧಿ॑ ಜಾ॒ತೋ ವನ॒ಸ್ಪತಿ॒ಸ್ತವ॑ ವೃ॒ಕ್ಷೋಽಥ ಬಿ॒ಲ್ವಃ |

ತಸ್ಯ॒ ಫಲಾ᳚ನಿ॒ ತಪ॒ಸಾ ನು॑ದಂತು ಮಾ॒ಯಾ ನ್ತ॑ರಾ॒ ಯಾಶ್ಚ॑ ಬಾ॒ಹ್ಯಾ, ಅ॑ಲ॒ಕ್ಷ್ಮೀಃ ||6||

ಉಪೈ᳚ತು॒ ಮಾಂ ದೇ᳚ವಸ॒ಖಃ ಕೀ॒ರ್‍ತಿಶ್ಚ॒ ಮಣಿ॑ನಾ ಸ॒ಹ |

ಪ್ರಾ॒ದು॒ರ್ಭೂ॒ತೋಽಸ್ಮಿ॑ ರಾಷ್ಟ್ರೇ॒ಽಸ್ಮಿನ್‌ ಕೀ॒ರ್‍ತಿಮೃ॑ದ್ಧಿಂ ದ॒ದಾತು॑ ಮೇ ||7||

ಕ್ಷುತ್ಪಿ॑ಪಾ॒ಸಾಮ॑ಲಾಂ ಜ್ಯೇ॒ಷ್ಠಾಮ॑ಲ॒ಕ್ಷ್ಮೀಂ ನಾ᳚ಶಯಾ॒ಮ್ಯಹಂ᳚ |

ಅಭೂ᳚ತಿ॒ಮಸ॑ಮೃದ್ಧಿಂ॒ ಚ ಸರ್‍ವಾಂ॒ ನಿರ್ಣು॑ದ ಮೇ॒ ಗೃಹಾ᳚ತ್ ||8||

ಗಂಧ॑ದ್ವಾ॒ರಾಂ ದು॑ರಾಧ॒ರ್ಷಾಂ ನಿ॒ತ್ಯಪು॑ಷ್ಟಾಂ ಕರೀ॒ಷಿಣೀಂ᳚ |

ಈ॒ಶ್ವರೀಂ᳚ ಸರ್‍ವ॑ಭೂತಾ॒ನಾಂ ತಾಮಿ॒ಹೋಪ॑ ಹ್ವಯೇ॒ ಶ್ರಿಯಂ᳚ ||9||

ಮನ॑ಸಃ॒ ಕಾಮ॒ಮಾಕೂ᳚ತಿಂ ವಾ॒ಚಃ ಸ॒ತ್ಯಮ॑ಶೀಮಹಿ |

ಪ॒ಶೂ॒ನಾಂ ರೂಪ॑ಮನ್ನ॒ಸ್ಯ ಮಯಿ॒ ಶ್ರೀಃ ಶ್ರ॑ಯತಾಂ॒ ಯಶಃ॑ ||10||[ವ:೨]

ಕರ್ದ॑ಮೇ॒ನ ಪ್ರ॑ಜಾ ಭೂ॒ತಾ ಮ॒ಯಿ ಸಂ᳚ಭವ॒ ಕರ್ದ॑ಮ |

ಶ್ರಿಯಂ᳚ ವಾ॒ಸಯ॑ ಮೇ ಕು॒ಲೇ ಮಾ॒ತರಂ᳚ ಪದ್ಮ॒ಮಾಲಿ॑ನೀಂ ||11||

ಆಪಃ॒ ಸೃಜಂ᳚ತು॒ ಸ್ನಿಗ್ಧಾ᳚ನಿ॒ ಚಿಕ್ಲೀ᳚ತ॒ ವಸ॑ ಮೇ ಗೃ॒ಹೇ |

ನಿ ಚ॑ ದೇ॒ವೀಂ ಮಾ॒ತರಂ॒ ಶ್ರಿಯಂ᳚ ವಾ॒ಸಯ॑ ಮೇ ಕು॒ಲೇ ||12||

ಆ॒ರ್ದ್ರಾಂ ಪು॒ಷ್ಕರಿ॑ಣೀಂ ಪು॒ಷ್ಟಿಂ ಸು॒ವರ್ಣಾ᳚ ಹೇಮ॒ಮಾಲಿ॑ನೀಂ |

ಸೂ॒ರ್‍ಯಾಂ ಹಿ॒ರಣ್ಮ॑ಯೀಂ ಲಕ್ಷ್ಮೀಂ॒ ಜಾತ॑ವೇದೋ ಮ॒ ಆವಹ ||13||

ಆ॒ರ್ದ್ರಾಂ ಯಃ॒ ಕರಿ॑ಣೀಂ ಯ॒ಷ್ಟಿಂ ಪಿಂ॒ಗಲಾಂ᳚ ಪದ್ಮ॒ಮಾಲಿ॑ನೀಂ |

ಚಂ॒ದ್ರಾಂ ಹಿ॒ರಣ್ಮ॑ಯೀಂ ಲ॒ಕ್ಷ್ಮೀಂ ಜಾತ॑ವೇದೋ ಮ॒ ಆವ॑ಹ ||14||

ತಾಂ ಮ॒ ಆವ॑ಹ ಜಾತವೇದೋ ಲ॒ಕ್ಷ್ಮೀಮನ॑ಪಗಾ॒ಮಿನೀಂ᳚ |

ಯಸ್ಯಾಂ॒ ಹಿರ᳚ಣ್ಯಂ॒ ಪ್ರಭೂ᳚ತಂ॒ ಗಾವೋ᳚ ದಾ॒ಸ್ಯೋಽಶ್ವಾ᳚ನ್‌ ವಿಂ॒ದೇಯಂ॒ ಪುರು॑ಷಾನ॒ಹಂ ||15||[ವ:೩]

ಯಃ ಶುಚಿಃ॒ ಪ್ರಯ॑ತೋ ಭೂ॒ತ್ವಾ ಜು॒ಹುಯಾ᳚ದಾಜ್ಯ॒ ಮನ್ವ॑ಹಂ |

ಶ್ರಿಯಃ॑ ಪಂ॒ಚದ॑ಶರ್ಚಂ॒ ಚ ಶ್ರೀ॒ಕಾಮಃ॑ ಸತ॒ತಂ ಜ॑ಪೇತ್ ||16||

ಪದ್ಮಾ᳚ನ॒ನೇ ಪ॑ದ್ಮ॒ವಿಪ॑ದ್ಮಪ॒ತ್ರೇ ಪದ್ಮ॑ಪ್ರಿಯೇ॒ ಪದ್ಮ॒ದಲಾ᳚ಯತಾ॒ಕ್ಷಿ |

ವಿಶ್ವ॑ಪ್ರಿಯೇ॒ ವಿಷ್ಣುಮನೋ᳚ನುಕೂ॒ಲೇ ತ್ವತ್ಪಾ᳚ದಪ॒ದ್ಮಂ ಮಯಿ॒ಸಂ ನಿ॑ ಧತ್ಸ್ವ ||17||

ಪ॒ದ್ಮಾ॒ನ॒ನೇ ಪ॑ದ್ಮ ಊ॒ರೂ ಪ॒ದ್ಮಾಕ್ಷೀ᳚ ಪದ್ಮ॒ಸಂಭ॑ವೇ |

ತನ್ಮೇ᳚ ಭ॒ಜಸಿ॑ ಪದ್ಮಾ॒ಕ್ಷೀ॒ ಯೇ॒ನ ಸೌ᳚ಖ್ಯಂ ಲ॒ಭಾಮ್ಯ॑ಹಂ ||18||

ಅಶ್ವ॑ದಾ॒ಯೀ ಗೋ᳚ದಾ॒ಯೀ ಧ॒ನದಾ᳚ಯೀ ಮ॒ಹಾಧ॑ನೇ |

ಧನಂ᳚ ಮೇ॒ ಜುಷ॑ತಾಂ ದೇ॒ವಿ ಸ॒ರ್‍ವಕಾ᳚ಮಾಂಶ್ಚ॒ ದೇಹಿ॑ ಮೇ ||19||

ಪುತ್ರಪೌ॒ತ್ರ ಧ॑ನಂ ಧಾ॒ನ್ಯಂ ಹ॒ಸ್ತ್ಯಶ್ವಾ᳚ದಿಗ॒ವೇ ರ॑ಥಂ |

ಪ್ರ॒ಜಾ॒ನಾಂ ಭ॑ವಸಿ ಮಾ॒ತಾ॒, ಆ॒ಯುಷ್ಮಂ᳚ತಂ ಕ॒ರೋತು॑ ಮೇ ||20||

ಧನ॑ಮ॒ಗ್ನಿರ್ಧ॑ನಂ ವಾ॒ಯುರ್ಧನಂ॒ ಸೂರ್‍ಯೋ᳚ ಧನಂ॒ ವಸುಃ॑ |

ಧನ॒ಮಿಂದ್ರೋ॒ ಬೃಹ॒ಸ್ಪತಿ॒ರ್‍ವರು॑ಣಂ॒ ಧನ॒ಮಸ್ತು॑ ತೇ ||21||[ವ:೪]

ವೈನ॑ತೇಯ॒ ಸೋಮಂ᳚ ಪಿಬ॒ ಸೋಮಂ᳚ ಪಿಬತು ವೃತ್ರ॒ಹಾ |

ಸೋಮಂ॒ ಧನ॑ಸ್ಯ ಸೋ॒ಮಿನೋ॒ ಮಹ್ಯಂ॒ ದದಾ᳚ತು ಸೋ॒ಮಿನಃ॑ ||22||

ನ ಕ್ರೋಧೋ ನ ಚ॑ ಮಾತ್ಸ॒ರ್‍ಯಂ॒ ನ॒ ಲೋಭೋ᳚ ನಾಶು॒ಭಾ ಮ॑ತಿಃ |

ಭವಂ᳚ತಿ॒ ಕೃತ॑ಪುಣ್ಯಾ॒ನಾಂ ಭ॒ಕ್ತ್ಯಾ ಶ್ರೀಸೂ᳚ಕ್ತ॒ ಜಾಪಿ॑ನಾಂ ||23||

ಸರಸಿಜನಿಲಯೇ ಸರೋ᳚ಜಹ॒ಸ್ತೇ ಧವಲತರಾಂಶುಕ ಗಂ॒ಧಮಾ᳚ಲ್ಯಶೋ॒ಭೇ |

ಭಗವತಿ ಹರಿವ॒ಲ್ಲಭೇ᳚ ಮನೋ॒ಜ್ಞೇ ತ್ರಿಭುವನಭೂತಿಕರಿ ಪ್ರ॑ ಸೀದ ಮ॒ಹ್ಯಂ ||24||

ವಿಷ್ಣು॑ಪ॒ತ್ನೀಂ ಕ್ಷ॑ಮಾಂ ದೇ॒ವೀಂ ಮಾ॒ಧವೀಂ᳚ ಮಾಧ॒ವಪ್ರಿ॑ಯಾಂ |

ಲಕ್ಷ್ಮೀಂ᳚ ಪ್ರಿ॒ಯಸ॑ಖೀಂ ದೇ॒ವೀಂ ನ॒ಮಾಮ್ಯ॑ಚ್ಯುತ॒ವಲ್ಲ॑ಭಾಂ ||25||

ಮ॒ಹಾ॒ಲ॒ಕ್ಷ್ಮ್ಯೈ ಚ॑ ವಿ॒ದ್ಮಹೇ᳚ ವಿಷ್ಣುಪ॒ತ್ನೀ ಚ॑ ಧೀಮಹಿ |

ತನ್ನೋ᳚ ಲಕ್ಷ್ಮೀಃ ಪ್ರಚೋ॒ದಯಾ᳚ತ್ ||26||

ಶ್ರೀ॒ವರ್ಚ॑ಸ್ವ॒ಮಾಯು॑ಷ್ಯ॒ಮಾರೋ᳚ಗ್ಯ॒ಮಾವಿ॑ಧಾ॒ಚ್ಚೋಭ॑ಮಾನಂ ಮಹೀ॒ಯತೇ᳚ |

ಧ॒ನಂ ಧಾ॒ನ್ಯಂ ಪ॒ಶುಂ ಬ॒ಹುಪು॑ತ್ರಲಾ॒ಭಂ ಶ॒ತಸಂ॑ವತ್ಸ॒ರಂ ದೀ॒ರ್ಘಮಾಯುಃ॑ ||27||[ವ:೫]

[12] [ಶ್ರೀಸೂಕ್ತಸ್ಯಾಂತೇ]
ವಿಶ್ವೇಶ್ವರ ವಿರೂಪಾಕ್ಷ ವಿಶ್ವರೂಪ ಸದಾಶಿವ |

ಶರಣಂ ಭವ ಭೂತೇಶ ಕರುಣಾಕರ ಶಂಕರ ||೧||

ಹರ ಶಂಭೋ ಮಹಾದೇವ ವಿಶ್ವೇಶಾಮರ ವಲ್ಲಭ |

ಶಿವಶಂಕರ ಸರ್‍ವಾತ್ಮನ್‌ ನೀಲಕಂಠ ನಮೋಽಸ್ತು ತೇ ||೨||

ಮೃತ್ಯುಂಜಯಾಯ ರುದ್ರಾಯ ನೀಲಕಂಠಾಯ ಶಂಭವೇ |

ಅಮೃತೇಶಾಯ ಶರ್‍ವಾಯ ಮಹಾದೇವಾಯ ತೇ ನಮಃ ||೩||

ಏತಾನಿ ಶಿವನಾಮಾನಿ ಯಃ ಪಠೇನ್ನಿಯತಃ ಸಕೃತ್ |

ನಾಸ್ತಿ ಮೃತ್ಯುಭಯಂ ತಸ್ಯ ಪಾಪರೋಗಾದಿ ಕಿಂಚನ ||೪||

[13] [ಶ್ರೀಸೂಕ್ತಸ್ಯಾಂತೇ]
ಯಜ್ಞೇಶಾಚ್ಯುತ ಗೋವಿಂದ ಮಾಧವಾನಂತ ಕೇಶವ |

ಕೃಷ್ಣ ವಿಷ್ಣೋ ಹೃಷೀಕೇಶ ವಾಸುದೇವ ನಮೋಽಸ್ತು ತೇ ||೧||

ಕೃಷ್ಣಾಯ ಗೋಪಿನಾಥಾಯ ಚಕ್ರಿಣೇ ಮುರವೈರಿಣೇ |

ಅಮೃತೇಶಾಯ ಗೋಪಾಯ ಗೋವಿಂದಾಯ ನಮೋ ನಮಃ ||೨||

[14] [ಶ್ರೀಸೂಕ್ತಸ್ಯಾಂತೇ]
ಉಗ್ರಾಯೋಘ್ರಾಘ ನಾಶಾಯ ಭೀಮಾಯ ಭಯ ಹಾರಿಣೇ |

ಈಶಾನಾಯ ನಮಸ್ತುಭ್ಯಂ ಪಶೂನಾಂ ಪತಯೇ ನಮಃ ||೧||

ದಶಸಪ್ತ ಚ ನಾಮಾನಿ ಮಂಡಲಾಂತೇಷು ಯಃ ಪಠೇಥ್ |

ಸಶಿವಸ್ಯ ಪದಂ‌ ಗತ್ವಾ ಶಿವಲೋಕೇ ಮಹೀಯತೇ ||೨||

ನಾಸ್ತಿ ಮೃತ್ಯುಭಯಂ ತಸ್ಯ ಪಾಪರೋಗಾದಿ ಕಿಂಚನ |

ಹರಿಹರ ಶಿವಶಂ‌ ಕರ ವಿಠ್ಠಲ ವಾಮನ ವಾಸುದೇವ ವಿರಾಮ ಸ್ಥಾವತ್, ವಿಶ್ವೇಶ್ವರಾಯ ನಮಃ ||೩||

[15] [ಋಗ್ವೇದ ಮಂಡಲ ೭, ೩೫ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೫, ಅಧ್ಯಾಯ ೩, ೩೦ ವರ್ಗಾನಂತರಂ]
ಶಂವ॑ತೀಃ॒ ಪಾರ॑ಯಂತ್ಯೇ॒ತೇ ತಂ ಪೃ॑ಚ್ಛಂತಿ॒ ವಚೋ᳚ ಯು॒ಜಾ᳚| ಅ॒ಭ್ಯಾರ್ಂ ತಂ ಯ॒ಮಾಕೇ᳚ತುಂ ಯ ಏ॒ವೇದಮಿತಿ॒ ಬ್ರವ॑ನ್ ||೧||
ಭಾ॒ಸಾಕೇ᳚ತುಂ ಪರಿ॒ಸ್ರುತಂ॒ ಭರ॑ತೀರ್ಬ್ರಹ್ಮವರ್ಧನಃ |

ಸಂ॒ಜಾ॒ನಾ॒ನಾ ಮಹೀ ಮಾತಾ ಏ॒ವೇದಮಿತಿ॒ ಬ್ರವ॑ತ್ ||೨||

ಇಂದ್ರಸ್ತಂ ಕಿಂ ವಿ॒ಭುಂ ಪ್ರ॒ಭುಂ ಮನುನೇ॒ಯಂ ಸರ॑ಸ್ವತೀಂ |

ಯೇನ॑ ಸೂ॒ರ್‍ಯ॒ಮರೋ᳚ಚಯ॒ದ್ಯೇನೇ॒ಮೇ ರೋದ॑ಸೀ, ಉ॒ಭೇ ||೩||

ಜುಷಸ್ವಾ᳚ಗ್ನೇ, ಅಂ॒ಗರಃ ಕ॒ಣ್ವಂ ಮೇಧ್ಯಾ᳚ತಿಥಿಂ |

ಮಾ ತ್ವಾ॒ ಸೋಮ॑ಸ್ಯ॒ ಬೃ॑ಹ॒ತ್ ಸು॒ತಸ್ಯ॒ ಮಧು॑ಮತ್ತಮಃ ||೪||

ತ್ವಮ॑ಗ್ನೇ॒, ಅಂಗಿ॑ರಃ॒ ಶೋಚ॑ಸ್ವ ದೇ॒ವ॒ವತ॑ಮಃ |

ಆ ಶ॑ತಮ॒ ಶಂತ॑ಮಾಭಿರ॒ಭಿಷ್ಟಿ॑ಭಿಃ ಶಾಂ॒ತಿಃ ಸ್ವ॒ಸ್ತಮ॑ಕುರ್‍ವತ ||೫||

ಶ॑ ನಃ॒ ಕನಿ॑ಕ್ರದ್ ದೇ॒ವಃ ಪ॒ರ್ಜನ್ಯೋ᳚, ಅ॒ಭಿ ವ॑ರ್ಷತು |

ಶಂ ನೋ॒ ದ್ಯಾವಾ᳚ಪೃಥಿ॒ವೀ ಶ॑ ಪ್ರ॒ಜಾಭ್ಯ॒ ಶಂ ನ॑ ಏಧಿಂ ದ್ವಿ॒ಪದೇ॒ ಶಂ ಚತು॑ಷ್ಪದೇ ||೬||

[16] [ಋಗ್ವೇದ ಮಂಡಲ ೭, ೫೫ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೫, ಅಧ್ಯಾಯ ೪, ೨೨ ವರ್ಗಾನಂತರಂ]
ಸ್ವಪ್ನಸ್ವಪ್ನಾಧಿಕರಣೇ ಸರ್‍ವಂ ನಿಷ್ವಾಪಯಾಜನಂ |

ಆಸೂರ್‍ಯಮನ್ಯಾನ್ ತ್ಸ್ವಾಪಯದ್ ವ್ಯೂಹ್ಲಂ ಜಾಗ್ರಿಯಾದಹಂ ||1||

ಅಜಗರೋ ನಾಮ ಸರ್ಪಃ ಸರ್ಪಿರವಿಷೋ ಮಹಾನ್ |

ತಸ್ಮಿನ್ಹಿ ಸರ್ಪಃ ಸುಧಿತಸ್ತೇನ ತ್ವಾಸ್ವಾಷಯಾಮಸಿ ||2||

ಸರ್ಪಃ ಸರ್ಪೋಽಜಗರಃ ಸರ್ಪಿರವಿಷೋ ಮಹಾನ್ |

ತಸ್ಯ ಸರ್ಪಾತ್ ಸಿಂಧವಸ್ತಸ್ಯ ಗಾಧಮಶೀಮಹಿ ||3||

ಕಾಳಿಕೋ ನಾಮ ಸರ್ಪೋ ನವನಾಗಸಹಸ್ರಬಳಃ |

ಯಮುನಹ್ರದೇಹಸೋ ಜಾತೋ ಯೋ ನಾರಾಯಣವಾಹನಃ ||4||

ಯದಿ ಕಾಳಿಕದೂತಸ್ಯ ಯದಿಕಾಃ ಕಾಳಿಕಾದ್ಭಯಾತ್ |

ಜನ್ಮಭೂಮಿಮತಿಕ್ರಾಂತೋ ನಿರ್‍ವಿಷೋ ಯಾತಿ ಕಾಳಿಕಃ ||5||

ಆಯಾಹೀಂದ್ರಪಥಿಭಿರೀಳಿತೇಭಿರ್‍ಯಜ್ಞಮಿಮಂ ನೋ ಭಾಗಧೇಯಂ ಜುಷಸ್ವ |

ತೃಪ್ತಾಂ ಜಹುರ್ಮಾತುಳಸ್ಯೇವ ಯೋಷಾಭಾಗಸ್ತೇ ಪೈತೃಷ್ವಸೇಯೀವಪಾಮಿವ ||6||

ಯಶಸ್ಕರಂ ಬಲವಂತಂ ಪ್ರಭುತ್ವಂ ತಮೇವ ರಾಜಾಧಿಪತಿರ್ಬಭೂವ |

ಸಂ‌ ಕೀರ್ಣನಾಗಾಶ್ವಪತಿರ್‍ನರಾಣಾಂ ಸುಮಂ‌ ಗಲ್ಯಂ ಸತತಂ ದೀರ್ಘಮಾಯುಃ ||7||

ಕರ್ಕೋಟಕೋ ನಾಮ ಸರ್ಪೋ ಯೋ ದೃಷ್ಟೀವಿಷ ಉಚ್ಯತೇ |

ತಸ್ಯ ಸರ್ಪಸ್ಯ ಸರ್ಪತ್ವಂ ತಸ್ಮೈ ಸರ್ಪ ನಮೋಽಸ್ತುತೇ ||8||

[17] [ಋಗ್ವೇದ ಮಂಡಲ ೭, ೧೦೩ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೭, ಅಧ್ಯಾಯ ೭, ೪ ವರ್ಗಾನಂತರಂ]ಪಾವಮಾನೀಃ
ಉಪ॒ಪ್ಲವ॑ತ ಮಂಡೂಕಿ ವ॒ರ್ಷ ಮಾ ವ॑ದ ತಾದುರಿ |

ಮಧ್ಯೇ᳚ ಹ್ರ॒ದಸ್ಯ॑ ಪ್ಲ॒ವಸ್ವ॑ ನಿ॒ಗೃಹ್ಯ॑ ಚ॒ತುರಃ॑ ಪ॒ದಃ ||

[18] [ಋಗ್ವೇದ ಮಂಡಲ ೯, ೬೭ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೭, ಅಧ್ಯಾಯ ೨, ೧೮ ವರ್ಗಾನಂತರಂ]ಪಾವಮಾನೀಃ
ಪಾ॒ವ॒ಮಾ॒ನೀಃ ಸ್ವ॒ಸ್ತ್ಯಯ॑ನೀಃ ಸು॒ದುಘಾ॒ ಹಿ ಘೃ॑ತ॒ಶ್ಚುತಃ॑ |

ಋಷಿ॑ಭಿಃ॒ ಸಂಭೃ॑ತೋ॒ ರಸೋ᳚ ಬ್ರಾಹ್ಮ॒ಣೇಷ್ವ॒ಮೃತಂ᳚ ಹಿ॒ತಂ ||1||

ಪಾ॒ವ॒ಮಾ॒ನೀರ್ದಿ॑ಶಂತು ನ ಇ॒ಮಂ ಲೋಕಮಥೋ᳚, ಅ॒ಮುಂ |

ಕಾಮಾಂ॒ತ್ಸಮ॑ರ್ಧಯಂತು ನೋ ದೇ॒ವೀರ್ದೇ॒ವೈಃ ಸ॒ಮಾಹಿ॑ತಾಃ ||2||

ಯೇನ॑ ದೇ॒ವಾಃ ಪ॒ವಿತ್ರೇ᳚ಣಾ॒ ಽಽತ್ಮಾನಂ᳚ ಪು॒ನತೇ॒ ಸದಾ᳚ |

ತೇನ॑ ಸ॒ಹಸ್ರ॑ಧಾರೇಣ ಪಾವಮಾ॒ನ್ಯಃ ಪು॑ನಂತು ಮಾಂ ||3||

ಪ್ರಾ॒ಜಾ॒ಪ॒ತ್ಯಂ ಪ॒ವಿತ್ರಂ᳚ ಶ॒ತೋದ್ಯಾ᳚ಮಂ ಹಿರ॒ಣ್ಮಯಂ᳚ |

ತೇನ॑ ಬ್ರಹ್ಮ॒ವಿದೋ᳚ ವ॒ಯಂ ಪೂ॒ತಂ ಬ್ರಹ್ಮ॑ ಪುನೀಮಹೇ ||4||

ಇಂದ್ರಃ॑ ಪುನೀ॒ತೀ ಸ॒ಹ ಮಾ᳚ ಪುನಾತು॒ ಸೋಮಃ॑ ಸ್ವ॒ಸ್ತ್ಯಾ ವರು॑ಣಃ ಸ॒ಮೀಚ್ಯಾ᳚ |

ಯ॒ಮೋ ರಾಜಾ᳚ ಪ್ರಮೃ॒ಣಾಭಿಃ॑ ಪುನಾತು ಮಾ ಜಾ॒ತವೇ᳚ದಾ ಮೂ॒ರ್ಜಯಂ᳚ತ್ಯಾ ಪುನಾತು ||5||

ಋ॒ಷ॒ಯ॒ಸ್ತು ತ॑ಪಸ್ತೇ॒ಪುಃ ಸ॒ರ್‍ವೇ ಸ್ವ॑ರ್ಗಜಿ॒ಗೀಷ॑ವಃ |

ತ॒ಪ॒ಸ॒ಸ್ತ॒ಪ॒ಸೋ॒ಗ್ರ್ಯಂ᳚ತು ಪಾ॒ವಮಾ᳚ನೀರೃ॒ಚೋಬ್ರ॑ವೀತ್ ||6||[ವ:೧]

ಯನ್ಮೇ॒ ಗರ್ಭೇ॒ ವಸ॑ತಃ ಪಾ॒ಪಮು॒ಗ್ರಂ ಯಜ್ಜಾ᳚ಯಮಾ॒ನಸ್ಯ॑ ಚ॒ ಕಿಂಚಿ॑ದನ್ಯತ್ |

ಜಾ॒ತಸ್ಯ॑ ಚ॒ ಯಚ್ಚಾ᳚ಪಿ ಚ॒ ವರ್ಧ॑ತೋ ಮೇ॒ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॒ನಾಮಿ ||7||

ಮಾ॒ತಾಪಿ॒ತ್ರೋರ್‍ಯ॒ನ್ನ ಕೃ॑ತಂ॒ ವಚೋ᳚ ಮೇ॒ ಯತ್‌ ಸ್ಥಾ᳚ವ॒ರಂ ಜಂ॒ಗಮ॑ಮಾಬ॒ಭೂವ॑ |

ವಿಶ್ವ॑ಸ್ಯ॒ ತತ್‌ ಪ್ರ॑ಹೃಷಿ॒ತಂ ವಚೋ᳚ ಮೇ॒ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||8||

ಗೋಘ್ನಾ॒ತ್ತಸ್ಕ॑ರತ್ವಾ॒ತ್‌ ಸ್ತ್ರೀವ॑ಧಾ॒ದ್‌ ಯಚ್ಚ॒ ಕಿಲ್ಬಿ॑ಷಂ |

ಪಾ॒ಪ॒ಕಂ ಚ॒ ಚರ॑ಣೇಭ್ಯ॒ಸ್ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||9||

ಬ್ರಹ್ಮ॑ವಧಾ॒ತ್‌ ಸುರಾ᳚ಪಾನಾ॒ತ್‌ ಸ್ವ᳚ರ್ಣಸ್ತೇಯಾದ್‌ ವೃಷ॑ಲಿಗಮನಮೈಥುನಸಂಗ॒ಮಾತ್ |

ಗು॒ರೋ॒ರ್ದಾ॒ರಾಧಿ॒ಗಮ॑ನಾಚ್ಚ॒ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||10||

ಬಾಲ॑ಘ್ನಾ॒ನ್‌ ಮಾತೃ॑ಪಿತೃವಧಾ॒ದ್‌ ಭೂಮಿ॑ತಸ್ಕರಾ॒ತ್‌ ಸರ್‍ವ॑ವರ್ಣಗಮನಮೈಥುನಸಂಗ॒ಮಾತ್ |

ಪಾ॒ಪೇಭ್ಯ॑ಶ್ಚ ಪ್ರ॒ತಿಗ್ರ॑ಹಾ॒ತ್‌ ಸದ್ಯಃ॑ ಪ್ರಹರತಿ॒ ಸರ್‍ವ॑ದುಷ್ಕೃತಂ॒ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||11||

ಕ್ರಯ॑ವಿಕ್ರಯಾ॒ದ್‌ ಯೋನಿ॑ದೋಷಾ॒ದ್‌ ಭಕ್ಷಾ॒ದ್‌ ಭೋಜ್ಯಾ᳚ತ್‌ ಪ್ರ॒ತಿಗ್ರ॑ಹಾತ್ |

ಅ॒ಸಂಭೋಜ॒ನಾಚ್ಚಾ᳚ಪಿ ನೃ॒ಶಂಸಂ॒ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||12||[ವ:೨]

ದುರ್‍ಯ॑ಷ್ಟಂ॒ ದುರ॑ಧೀತಂ ಪಾಪಂ॒ ಯಚ್ಚಾ᳚ಜ್ಞಾನ॒ತೋ ಕೃತಂ |

ಅ॒ಯಾ॒ಜಿ॒ತಾ ಶ್ಚಾ॒ಸಂಯಾ᳚ಜ್ಯಾ॒ಸ್ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||13||

ಅ॒ಮಂ॒ತ್ರ॒ಮನ್ನಂ᳚ ಯತ್‌ ಕಿಂ॒ಚಿದ್ಧೂ॒ಯತೇ᳚ ಚ ಹು॒ತಾಶ॑ನೇ |

ಸಂವ॑ತ್ಸ॒ರಕೃ॑ತಂ ಪಾ॒ಪಂ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||14||

ಋ॒ತಸ್ಯ॒ ಯೋನ॑ಯೋಽಮೃ॒ತಸ್ಯ॒ ಧಾಮ॒ ವಿಶ್ವಾ᳚ ದೇ॒ವೇಭ್ಯಃ॒ ಪುಣ್ಯ॑ಗಂಧಾಃ |

ತಾ॒ ನ॒ ಆ॒ಪಃ॒ ಪ್ರ॒ ವಹಂ᳚ತು ಪಾ॒ಪಂ ಶು॒ದ್ಧಾ॒ ಗ॒ಚ್ಛಾ॒ಮಿ॒ ಸು॒ಕೃತಾ᳚ಮುಲೋ॒ಕಂ ತತ್‌ ಪಾ᳚ವಮಾ॒ನೀಭಿ॑ರ॒ಹಂ ಪು॑ನಾಮಿ ||15||

ಪಾ॒ವ॒ಮಾ॒ನೀಃ ಸ್ವ॒ಸ್ತ್ಯಯ॑ನೀ॒ರ್‌ಯಾಭಿ॑ರ್ಗಚ್ಛತಿ ನಾಂದ॒ನಂ |

ಪುಣ್ಯಾಂ᳚ಶ್ಚ ಭ॒ಕ್ಷ್ಯಾನ್‌ ಭ॑ಕ್ಷಯತ್ಯಮೃತ॒ತ್ವಂ ಚ॑ ಗಚ್ಛತಿ ||16||

ಪಾ॒ವ॒ಮಾ॒ನೀಃ ಪಿ॒ತೄನ್‌ ದೇವಾನ್‌ ಧ್ಯಾ॒ಯೇದ್‌ ಯ॑ಶ್ಚ ಸ॒ರಸ್ವ॑ತೀಂ |

ಪಿತೄಂ᳚ಸ್ತ॒ಸ್ಯೋಪ॑ ವರ್‍ತೇ॒ತ ಕ್ಷೀ॒ರಂ ಸ॒ರ್ಪಿರ್ಮಧೂ᳚ದ॒ಕಂ ||17||

ಪಾ॒ವ॒ಮಾ॒ನಂ ಪ॑ರಂ ಬ್ರ॒ಹ್ಮ ಶು॒ಕ್ರಂ ಜ್ಯೋ᳚ತಿಃ ಸ॒ನಾತ॑ನಂ |

ಋಷೀಂ᳚ಸ್ತ॒ಸ್ಯೋಪ॑ ತಿಷ್ಠೇ॒ತ ಕ್ಷೀ॒ರಂ ಸ॒ರ್ಪಿರ್ಮಧೂ᳚ದ॒ಕಂ ||18||

ಪಾ॒ವ॒ಮಾ॒ನಂ ಪ॑ರಂ ಬ್ರ॒ಹ್ಮ ಯೇ॒ ಪಠಂ᳚ತಿ ಮ॒ನೀಷಿ॑ಣಃ |

ಸಪ್ತ॑ ಜ॒ನ್ಮ ಭ॑ವೇದ್‌ ವಿ॒ಪ್ರೋ ಧ॒ನಾಢ್ಯೋ᳚ ವೇದ॒ಪಾರ॑ಗಃ ||19||

ದಶೋ᳚ತ್ತ॒ರಾಣ್ಯೃ॑ಚಾಂಶ್ಚೈ॒ವ ಪಾ॒ವಮಾ᳚ನೀಃ ಶ॒ತಾನಿ॑ ಷಟ್ |

ಏ॒ತ॒ಜ್ಜು॒ಹ್ವ॒ನ್‌ ಜ॒ಪೇ॒ನ್ಮಂತ್ರಂ᳚ ಘೋ॒ರಮೃ॑ತ್ಯುಭ॒ಯಂ ಹ॑ರೇತ್ ||20||

ಏತತ್‌ ಪು॒ಣ್ಯಂ ಪಾ᳚ಪಹ॒ರಂ ರೋ॒ಗಮೃ॑ತ್ಯುಭ॒ಯಾಪ॑ಹಂ |

ಪಠ॑ತಾಂ ಶೃಣ್ವ॑ತಾಂ ಚೈ॒ವ ದ॒ದಾತಿ॑ ಪರ॒ಮಾಂ ಗ॑ತಿಂ ||21||[ವ:೩]

[19] [ಋಗ್ವೇದ ಮಂಡಲ ೯, ೧೧೪ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೭, ಅಧ್ಯಾಯ ೫, ೨೮ ವರ್ಗಾನಂತರಂ]
ಯತ್ರ ತತ್‌ ಪರಮಂ ಪದಂ ವಿಷ್ಣೋರ್ಲೋಕೇ ಮಹೀಯತೇ |

ದೇವೈಃ ಸುಕೃತಕರ್ಮಭಿಸ್ತತ್ರ ಮಾಮಮೃತಂ ಕೃಧೀಂದ್ರಾಯೇಂದೋಪರಿಸ್ರವ ||1||

ಯತ್ರ ತತ್‌ ಪರಮಾಯ್ಯಂ ಭೂತಾನಾಮಧಿಪತಿಂ |

ಭಾವಭಾವೀ ಚ ಯೋಗೀಶ್ಚ ತತ್ರ ಮಾಮಮೃತಂ ಕೃಧೀಂದ್ರಾಯೇಂದೋಪರಿಸ್ರವ ||2||

ಯತ್ರ ಲೋಕಾಸ್ತನೂತ್ಯಜಃ ಶ್ರದ್ಧ್ಯಾ ತಪಸಾಜಿತಾಃ |

ತೇಜಶ್ಚ ಯತ್ರ ಬ್ರಹ್ಮ ಚ ತತ್ರ ಮಾಮಮೃತಂ ಕೃಧೀಂದ್ರಾಯೇಂದೋಪರಿಸ್ರವ ||3||

ಯತ್ರ ದೇವಾ ಮಹಾತ್ಮಾನಃ ಸೇಂದ್ರಾಶ್ಚ ಮರುದ್ಗಣಾಃ |

ಬ್ರಹ್ಮಾ ಚ ಯತ್ರ ವಿಷ್ಣುಶ್ಚ ತತ್ರ ಮಾಮಮೃತಂ ಕೃಧೀಂದ್ರಾಯೇಂದೋಪರಿಸ್ರವ ||4||

ಯತ್ರ ಗಂಗಾ ಚ ಯಮುನಾ ಯತ್ರ ಪ್ರಾಚೀ ಸರಸ್ವತೀ |

ಯತ್ರ ಸೋಮೇಶ್ವರೋ ದೇವಸ್ತತ್ರ ಮಾಮಮೃತಂ ಕೃಧೀಂದ್ರಾಯೇಂದೋಪರಿಸ್ರವ ||5||

[20] [ಋಗ್ವೇದ ಮಂಡಲ ೧೦, ೧೨೭ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೭, ೧೪ ವರ್ಗಾನಂತರಂ]
ಆ ರಾ᳚ತ್ರಿ॒ ಪಾರ್‍ಥಿ॑ವಂ॒ ರಜಃ॑ ಪಿ॒ತರಃ॑ ಪ್ರಾಯು॒ ಧಾಮ॑ಭಿಃ |

ದಿ॒ವಃ ಸತಾಂ᳚ಸಿ ಬೃಹ॒ತೀ ವಿ ತಿ॑ಷ್ಠ ಸ॒ ಆ ತ್ವೇ॒ಷಂ ವ॑ರ್‍ತತೇ ತಮಃ॑ ||1||

ಯೇ ತೇ᳚ ರಾತ್ರಿ ನೃ॒ಚಕ್ಷ॑ಸೋ ಯು॒ಕ್ತಾಸೋ᳚ ನ॒ವತಿರ್‍ನವ॑ |

ಅಶೀತಿಃ॑ ಸಂತ್ವ॒ಷ್ಟಾ॒, ಉ॒ತೋ ತೇ᳚ ಸಪ್ತ॒ ಸಪ್ತ॑ತೀಃ ||2||

ರಾತ್ರೀಂ॒ ಪ್ರಪ॑ತ್ಯೇ ಜ॒ನನೀಂ᳚ ಸ॒ರ್‍ವಭೂ᳚ತನಿವೇಶ॑ನೀಂ |

ಭ॒ದ್ರಾಂ ಭ॒ಗವ॑ತೀಂ ಕೃ॒ಷ್ಣಾಂ॒ ವಿ॒ಶ್ವಸ್ಯ॑ ಜಗ॒ತೋ ನಿ॑ಶಾಂ ||3||

ಸ॒ಮ್ವೇ॒ಶಿ॒ನೀಂ᳚ ಸಂ॒ಯ॒ಮಿ॒ನೀಂ॒ ಗ್ರ॒ಹನ॑ಕ್ಷತ್ರ॒ಮಾಲಿ॑ನೀಂ |

ಪ್ರಪ᳚ನ್ನೋ॒ಽಹಂ ಶಿ॑ವಾಂ ರಾ॒ತ್ರೀಂ॒ ಭ॒ದ್ರೇ ಪಾ᳚ರಮ॒ಶೀಮ॑ಹಿ (ಭ॒ದ್ರೇ ಪಾರಮ॒ಶೀಮ॒ಹ್ಯೋಂ ನಮಃ॑) ||4||

ಸ್ತೋ॒ಷ್ಯಾ॒ಮಿ॒ ಪ್ರಯತೋ॒ ದೇವೀಂ᳚ ಶ॒ರಣ್ಯಾಂ᳚ ಬಹ್ವೃ॒ಚಪ್ರಿ॑ಯಾಂ |

ಸ॒ಹ॒ಸ್ರ॒ಸಂಹಿ॑ತಾಂ ದು॒ರ್ಗಾಂ ಜಾ॒ತವೇ᳚ದಸೇ ಸುನವಾಮ॒ ಸೋಮಂ᳚ ||5||

ಶಾಂ॒ತ್ಯ॒ರ್‍ಥಂ॒ ತದ್ದ್ವಿ॒ಜಾ॒ತೀನಾ᳚ಋ॒ಷಿಭಿಃ॑ ಸೋಮ॒ಪಾಶ್ರಿ॑ತಾಃ |

ಋಕ್ವೇ᳚ದೇ॒ ತ್ವಂ ಸಂಮೂತ್ಪ॒ನಾಽರಾ᳚ತ್ರೀಯ॒ತೋ ನಿ ದ॑ಹಾತಿ॒ ವೇದಃ॑ ||6||

ಯೇ ತ್ವಾಂ᳚ ದೇ॒ವಿ ಪ್ರ॒ ಪತ್ಯಂ᳚ತಿ ಬ್ರಾ॒ಹ್ಮಣಾ᳚ ಹವ್ಯ॒ವಾಹ॑ನೀಂ |

ಅ॒ವಿ॒ತ್ಯಾ॒ ಬಹು॑ವಿತ್ಯಾ॒ ವಾ॒ ಸನಃ॑ ಪರ್ಷ॒ದತಿ॑ ದುರ್ಗಾಣಿ॒ ವಿಶ್ವಾ᳚ ||7||

ಯೇ, ಅ॒ಕ್ನಿವರ್᳚ಣಾಂ ಶು॑ಭಾಂ ಸೌ॒ಮ್ಯಾಂ ಕೀ॒ರ್‍ತಯಿ॑ಷ್ಯಂತಿ॒ ಯೇ ದ್ವಿ॑ಜಾಃ |

ತಾ॒ಮ್ಸ್ತಾ॒ರ॒ಯ॒ತಿ॒ ದುರ್ಗಾ᳚ಣಿ ನಾ॒ವೇವ ಸಿಂಧುಂ᳚ ದುರಿ॒ತಾತ್ಯ॒ಗ್ನಿಃ ||8||

ದುರ್ಗೇ᳚ಷು ವಿಷಮೇ ಘೋರೇ᳚ ಸಂಗ್ರಾಮೇ᳚ ರಿಪುಸಂಕ॑ಟೇ |

ಅಗ್ನಿಚೋರನಿ॑ಪಾತೇಷು ದುಷ್ಠಗ್ರ॑ಹನಿವಾರಿಣಿ ದುಷ್ಠಗ್ರ॑ಹನಿವಾರಿಣ್ಯೋನ್ನಮಃ॑ ||9||

ದುರ್ಗೇಷು॒ ವಿಷ್॑ಮೇಷು॒ ತ್ವಂ᳚ ಸಂ॒ಗ್ರಾಮೇ᳚ಷು ವ॒ನೇಷು॑ ಚ |

ಮೋ॒ಹ॒ಯಿ॒ತ್ವಾ 'ಪ್ರ॑ಪತ್ಯ॒ಮ್ನ್ತೇ ತೇ॒ಷಾಂ ಮೇ᳚ ಅಭ॒ಯಂ ಕು॑ರು ||10||

ತೇ॒ಷಾಂ ಮೇ, ಅಭ॒ಯಂ ಕು॑ರುವೋನ್ನಮಃ॑ |

ಕೇ॒ಶಿ॒ನೀಂ᳚ ಸರ್‍ವ॑ಭೂತಾ॒ನಾಂ॒ ಪಂ॒ಚಮೀ᳚ತಿ ಚ॒ ನಾಮ॑ ಚ ||11||

ಸಾ॒ ಮಾಂ॒ ಸ॒ಮಾ॒ ನಿ॒ಶಾ॒ ದೇವೀ᳚ ಸ॒ರ್‍ವತಃ॑ ಪರಿ॒ ರಕ್ಷ॑ತು |

ಸ॒ರ್‍ವತಃ॑ ಪರಿ॒ ರಕ್ಷ॒ತ್ವೋನ್ನಮಃ॑ ||12||

ತಾಮ॒ಗ್ನಿವ᳚ರ್ಣಾಂ॒ ತಪಸಾ ಜ್ವಲ॒ಮ್ತೀಂ ವೈ᳚ರೋಚ॒ನೀಂ ಕರ್᳚ಮಫ॒ಲೇಷು ಜುಷ್ಟಾಂ᳚ |

ದು॒ರ್ಗಾಂ॒ ದೇ॒ವೀಂ ಶರ॑ಣಮ॒ಹಂ ಪ್ರಪ॑ದ್ಯೇ ಸು॒ತರ॑ಸಿ ತರಸೇ॒ ನಮಃ॑ ||13||

ದುರ್ಗಾ᳚ ದುರ್॒ಗೇಷು॑ ಸ್ಥಾನೇ॒ಷು ಶಂ॒ ನೋ ದೇ᳚ವೀರ॒ಭಿ॑ಷ್ಟಯೇ |

ಯ ಇ॒ಮಂ ದು॒ರ್ಗಾಸ್ತ॑ವಂ ಪು॒ಣ್ಯಂ ರಾ॒ತ್ರೌರಾ᳚ತ್ರೌ ಸ॒ದಾ ಪ॑ಠೇತ್ ||14||

ರಾತ್ರಿಃ ಕುಶಿ॑ಕಸೋ॒ಭ॒ರೋ॒ ರಾತ್ರಿ॒ರ್‍ವಾ ಭಾ᳚ರದ್ವಾ॒ಜೀ ರಾತ್ರಿ॒ಸ್ತವೋ᳚ ಗಾಯ॒ತ್ರೀ |

ರಾತರೀ᳚ಸೂ॒ಕ್ತಂ ಜಪೇ᳚ನ್ನಿ॒ತ್ಯಂ॒ ತ॒ತ್ಕಾಲ॑ಮುಪಪ॒ದ್ಯ॑ತೇ ||15||

ಉಲೂ᳚ಕಯಾತುಂ ಶೀಶೀ॒ಲೂಕ॑ಯಾತುಂ ಜ॒ಹಿ ಶ್ವಯಾ᳚ತುಮು॒ತ ಕೋಕ॑ಯಾತುಂ |

ಸು॒ಪ॒ರ್ಣಯಾ᳚ತುಮುತ ಗೃ॑ಧ್ರಯಾತುಂ ದೃ॒ಷದೇ᳚ವ ಪ್ರಮೃ॑ಣ॒ ರಕ್ಷ॑ ಇಂದ್ರ ||16||

ಪಿ॒ಶಂಗ॑ಭೃಷಟಿ॒ಮಂಭೃ॒ಣಂ ಪಿ॒ಶಾಚಿ॑ಮಿಂದ್ರ॒ ಸಂ ಮೃ॑ಣ |

ಸರ್‍ವಂ॒ ರಕ್ಷೋ॒ ನಿಬರ್᳚ಹಯ ||17||

ಹಿ॒ಮಸ್ಯ॑ ತ್ವಾ ಜ॒ರಾಯು॑ಣಾ ಶಾಲೇ॒ ಪರಿ᳚ ವ್ಯಯಾಮಸಿ |(ಉತ॒ ಹ್ರ॒ದೋ ಹಿ॑ ನೋ ಧಿಯೋ॒ಗ್ನಿರ್ದ॑ದಾತು ಭೇಷ॒ಜಂ) ||18||
ಶೀಶೀ᳚ತಹ್ರ॒ದೋ ಹಿ॑ ನೋ ಧಿಯೋ॒ಗ್ನಿರ್ದ॑ದಾತು ಭೇಷ॒ಜಂ |

ಅಂತಿ॒ಕಾಮ॒ಗ್ನಿಮ॑ಜನಯ॑ ದೂರ್‍ವಾ᳚ದಃ॑ ಶೀ॒ಶೀಲಾಗ॑ಮತ್ ||19||

ಅ॒ಜಾತಪುತ್ರಪ॒ಕ್ಷಾಯಾ᳚ ಹೃ॒ದಯಂ॒ ಮಮ॑ ದೂಯತೇ |

ವಿಪು॑ಲಂ॒ ವನಂ᳚ ಬ॒ಹ್ವಾಕಾ᳚ಶಂ ಚರ॑ ಜಾತವೇದಃ॒ ಕಾಮಾ᳚ಯ ||20||

ಮಾಂ॒ ಚ॒ ರಕ್ಷ॒ ಪುತ್ರಾಂ᳚ಶ್ಚ ಶರ॑ಣಮಭೂ॒ತ್ತವ॑ |

ಪಿ॒\ಙ್ಗಾಕ್ಷ॒ ಲೋಹಿ॒ತಗ್ರೀ᳚ವ ಕೃ॒ಷ್ಣವ᳚ರ್ಣ ನ॒ಮೋಸ್ತು॑ ತೇ ||21||

ಅ॒ಸ್ಮಾನ್ನಿ॒ಬರ್ಹ॑ರಸ್ಯೇನಾಂ॒ ಸಾ॒ಗರ॑ಸ್ಯೋರ್ಮ॒ಯೋ ಯ॑ಥಾ |

ಇಂದ್ರಃ॑ ಕ್ಷ॒ತ್ರಂ ದ॑ದಾತು॒ ವರೂ᳚ಣಮ॒ಭಿ ಷಿಂ᳚ಚತು ||22||

ಶ॒ತ್ರ॒ವೋ॒ ನಿಧ॑ನಂ ಯಾಂ॒ತು॒ ಜ॒ಯ ತ್ವಂ᳚ ಬ್ರಹ್ಮ॒ತೇಜ॑ಸಾ |

ಕ॒ಪಿ॒ಲ॒ಜ॒ಟೀಂ᳚ ಸರ್‍ವ॑ಭಕ್ಷಂ॒ ಚಾ॒ಗ್ನಿಂ ಪ್ರ॑ತ್ಯಕ್ಷ॒ ದೈವ॑ತಂ ||23||

ವ॒ರು॒ಣಂ॒ ಚ॒ ವ॒ಶಾ॒ಮ್ಯಗ್ರೇ᳚ ಮ॒ಮ ಪು॑ತ್ರಾಂಶ್ಚ॒ ರಕ್ಷ॑ತು (ಮ॒ಮ ಪು॑ತ್ರಾಂಶ್ಚ॒ ರಕ್ಷ॒ತ್ವೋನ್ನಮಃ॑) |

ಸಾಗ್ರಂ᳚ ವ॒ರ್ಷಶ॒ತಂ ಜೀ᳚ವ ಪಿ॒ಬ ಖಾ᳚ದ ಚ॒ ಮೋದ॑ ಚ ||24||

ದು॒:ಖಿ॒ತಾಂ॒ಶ್ಚ ದ್ವಿ॑ಜಾಂಶ್ಚೈ॒ವ ಪ್ರ॒ಜಾಂ ಚ॑ ಪಶು॒ ಪಾಲ॑ಯ |

ಯಾವ॑ದಾ॒ದಿತ್ಯಸ್ತ॑ಪತಿ॒ ಯಾವ॑ದ್ಭ್ರಾಜತಿ॒ ಚಂದ್ರ॑ಮಾಃ ||25||

ಯಾ॒ವ॒ದ್ವಾ॒ಯುಃ ಪ್ಲವಾ᳚ಯತಿ॒ ತಾವ॑ಜ್ಜೀವ॒ ಜಯಾ᳚ ಜಯ |

ಯೇನ॑ ಕೇ॒ನ ಪ್ರ॑ಕಾರೇ॒ಣ ಕೋ॒ ಹಿ ನಾ᳚ಮ ನು॒ ಜೀವ॑ತಿ ||26||

ಪರೇ᳚ಷಾ॒ಮುಪ॑ಕಾರಾರ್‍ಥಂ ಯ॒ಜ್ಜೀವ॑ತಿ ಸ॒ ಜೀವ॑ತಿ |

ಏ॒ತಾಂ॒ ವೈ॒ಶ್ವಾನರೀಂ᳚ ಸ॒ರ್‍ವದೇ᳚ವಾನ್ನ॒ಮೋಸ್ತು॑ ತೇ ||27||

ನ ಚೋ᳚ರ॒ಭಯಂ॒ ನ ಚ॑ ಸರ್ಪ॒ಭಯಂ॒ ನ ಚ᳚ ವ್ಯಾಘ್ರ॒ಭಯಂ॒ ನ ಚ॑ ಮೃತ್ಯು॒ಭಯಂ᳚ |

ಯ॒ಸ್ಯಾ॒ಪ॒ಮೃ॒ತ್ಯುರ್‍ನ ಚ ಮೃ॒ತ್ಯುಃ ಸರ್‍ವಂ᳚ ಲಭತೇ॒ ಸರ್‍ವಂ᳚ ಜಯತೇ ||28||

[21] [ಋಗ್ವೇದ ಮಂಡಲ ೧೦, ೧೨೮ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೭, ೧೬ ವರ್ಗಾನಂತರಂ]
ಆ॒ಯುಷ್ಯಂ᳚ ವ॒ರ್ಚಸ್ಯಂ᳚ ರಾ॒ಯಸ್ಪೋ᳚ಷ॒ಮೌದ್ಭಿ॑ದ್ಯಂ |

ಇ॒ದಂ ಹಿರ᳚ಣ್ಯಂ॒ ವರ್ಚ॑ಸ್ವ॒ಜ್ಜೈತ್ರಾ॒ಯಾ ವಿ॑ಶತಾದಿ॒ಮಾಂ ||1||

ಉ॒ಚ್ಚೈ॒ರ್‍ವಾ॒ಜಿ ಪೃ॑ತನಾ॒ಷಾಟ್‌ ಸ॑ಭಾಸಾ॒ಹಂ ಧ॑ನಂಜ॒ಯಂ |

ಸರ್‍ವಾಃ॒ ಸಮ॑ಗ್ರಾ॒ ಋದ್ಧ॑ಯೋ॒ ಹಿರ᳚ಣ್ಯೇ॒ಽಸ್ಮಿನ್‌ ಸ॒ಮಾಹಿ॑ತಾಃ ||2||

ಶು॒ನಮ॒ಹಂ ಹಿರ᳚ಣ್ಯಸ್ಯ ಪಿ॒ತುರ್ಮಾನೇ᳚ವ ಜ॒ಗ್ರಭ॑ |

ತೇನ॒ ಮಾಂ ಸೂರ್‍ಯತ್ವಚ॒ಮಕ॑ರಂ ಪೂ॒ರುಷು॑ ಪ್ರಿ॒ಯಂ ||3||

ಸ॒ಮ್ರಾಜಂ᳚ ಚ ವಿ॒ರಾಜಂ᳚ ಚಾಽಭಿಷ್ಟಿ॒ರ್‍ಯಾ ಚ॑ ಮೇ ಧ್ರು॒ವಾ |

ಲ॒ಕ್ಷ್ಮೀ ರಾ॒ಷ್ಟ್ರಸ್ಯ॒ ಯಾ ಮು॑ಖೇ॒ ತಯಾ॒ ಮಾಮಿಂ᳚ದ್ರ॒ ಸಂ ಸೃ॑ಜ ||4||

ಅ॒ಗ್ನೇಃ ಪ್ರಜಾ᳚ತಂ॒ ಪರಿ॒ ಯದ್ಧಿರ᳚ಣ್ಯಮ॒ಮೃತಂ᳚ ಯ॒ಜ್ಞೇ, ಅಧಿ॒ ಮರ್‍ತ್ಯೇ᳚ಷು |

ಯ ಏ᳚ನ॒ದ್‌ ವೇದ॒ ಸ ಇದೇ᳚ನಮರ್ಹತಿ ಜ॒ರಾಮೃ॒ತ್ಯುರ್ಭ॑ವತಿ॒ ಯೋ ಬಿ॒ಭರ್‍ತಿ॑ ||5||[ವ:೧]

ಯದ್‌ ವೇದ॒ ರಾಜಾ॒ ವರು॑ಣೋ॒ ಯದು॑ ದೇ॒ವೀ ಸರ॑ಸ್ವತೀ |

ಇಂದ್ರೋ॒ ಯದ್‌ ವೃ॑ತ್ರ॒ಹಾ ವೇ᳚ದ॒ ತನ್ಮೇ॒ ವರ್ಚ॑ಸ॒ ಆಯು॑ಷೇ ||6||

ನ ತದ್‌ ರಕ್ಷಾಂ॑ಸಿ॒ ನ ಪಿ॑ಶಾ॒ಚಾಶ್ಚ॑ರಂತಿ ದೇ॒ವಾನಾ॒ಮೋಜಃ॑ ಪ್ರಥಮ॒ಜಂ ಹ್ಯೇ॒ (ಏ॒) ೧॒॑ ತತ್ |

ಯೋ ಬಿ॒ಭರ್‍ತಿ॑ ದಾಕ್ಷಾಯ॒ಣಾ ಹಿರ᳚ಣ್ಯಂ॒ ಸ ದೇ॒ವೇಷು॑ ಕೃಣುತೇ ದೀ॒ರ್ಘಮಾ᳚ಯುಃ॒ ಸ ಮ॑ನು॒ಷ್ಯೇ᳚ಷು ಕೃಣುತೇ ದೀ॒ರ್ಘಮಾಯುಃ॑ ||7||

ಯ॒ದಾ ಬ॑ಧ್ನನ್‌ ದಾಕ್ಷಾಯ॒ಣಾ ಹಿರ᳚ಣ್ಯಂ ಶ॒ತಾನೀ᳚ಕಾಯ ಸುಮನ॒ಸ್ಯಮಾ᳚ನಾ |

ತನ್ನ॒ ಆ ಬ॑ಧ್ನಾಮಿ ಶ॒ತ ಶಾ᳚ರದಾ॒ಯಾಽಯು॑ಷ್ಮಾನ್‌ ಜ॒ರದ॑ಷ್ಟಿ॒ರ್‍ಯಥಾಸ॑ತ್ ||8||

ಘೃ॒ತಾದುರ್ಲು॑ಪ್ತಂ॒ ಮಧು॑ಮತ್‌ ಸು॒ವರ್ಣಂ᳚ ಧನಂಜ॒ಯಂ ಧ॒ರುಣಂ ಧಾರಯಿ॒ಷ್ಣು ||9||
ಋ॒ಣಕ್‌ ಸ॒ಪತ್ನಾ॒ ದಧ॑ರಾಁಶ್ಚ ಕೃ॒ಣ್ವದಾರೋ᳚ಹ ಮಾಂ ಮಹ॒ತೇ ಸೌಭ॑ಗಾಯ ||10||
ಪ್ರಿ॒ಯಂ ಮಾ᳚ ಕುರು ದೇ॒ವೇಷು॑ ಪ್ರಿ॒ಯಂ ರಾಜ॑ಸು ಮಾ ಕುರು |

ಪ್ರಿ॒ಯಂ ವಿಶ್ವೇ᳚ಷು ಗೋ॒ಪ್ತ್ರೇಷು॒ ಮಯಿ॑ ಧೇಹಿ ರು॒ಚಾ ರುಚಂ᳚ ||11||

ಅ॒ಗ್ನಿರ್‍ಯೇನ॑ ವಿ॒ರಾಜ॑ತಿ॒ ಸೂರ್‍ಯೋ॒ ಯೇನ॑ ವಿ॒ರಾಜ॑ತಿ ||12||
ವಿ॒ರಾಜ್ಯೇನ॒ ವಿರಾ᳚ಜತಿ॒ ತೇನಾ॒ಸ್ಮಾನ್‌ ಬ್ರ᳚ಹ್ಮಣಸ್ಪತೇ॒ ವಿರಾ᳚ಜ ಸ॒ಮಿಧಂ᳚ ಕುರು ||13||[ವ:೨]
[22] [ಋಗ್ವೇದ ಮಂಡಲ ೧೦, ೧೫೧ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೮, ೯ ವರ್ಗಾನಂತರಂ]
ಮೇ॒ಧಾಂ ಮಹ್ಯ॒ಮಂಗಿ॑ರಸೋ ಮೇ॒ಧಾಂ ಸ॒ಪ್ತ ಋಷ॑ಯೋ ದದುಃ |

ಮೇ॒ಧಾಮಿಂದ್ರ॑ಶ್ಚಾ॒ಗ್ನಿಶ್ಚ॑ ಮೇ॒ಧಾಂ ಧಾ॒ತಾ ದ॑ದಾತು ತೇ ||1||

ಮೇ॒ಧಾಂ ತೇ॒ ವರು॑ಣೋ ರಾ॒ಜಾ ಮೇ॒ಧಾಂ ದೇ॒ವೀ ಸರ॑ಸ್ವತೀ |

ಮೇ॒ಧಾಂ ತೇ᳚, ಅ॒ಶ್ವಿನೌ᳚ ದೇ॒ವಾವಾ ಧ॑ತ್ತಾಂ॒ ಪುಷ್ಕ॑ರಸ್ರಜಾ ||2||

ಯಾ ಮೇ॒ಧಾ, ಅ॑ಪ್ಸ॒ರಸ್ಸು॑ ಗಂಧ॒ರ್‍ವೇಷು॑ ಚ॒ ಯನ್ಮನಃ॑ |

ದೈವೀ॒ ಯಾ ಮಾನು॑ಷೀ ಮೇ॒ಧಾ ಸಾ ಮಾ॒ಮಾ ವಿ॑ಶತಾದಿ॒ಮಾಂ ||3||

ಯನ್ಮೇ॒ ನೋಕ್ತಂ॒ ತದ್ರ॑ಮತಾಂ॒ ಶಕೇ᳚ಯಂ॒ ಯದ॑ನು॒ಬ್ರುವೇ᳚ |

ನಿಶಾ᳚ಮತಂ॒ ನಿ ಶಾ᳚ಮಹೈ॒ ಮಯಿ᳚ ವ್ರ॒ತಂ ಸ॒ಹ ವ್ರ॒ತೇಷು ಭೂಯಾಸಂ॒ ಬ್ರಹ್ಮ॑ಣಾ॒ ಸಂ ಗ॑ಮೇಮಹಿ ||4||

ಶರೀ᳚ರಂ ಮೇ॒ ವಿಚ॑ಕ್ಷಣಂ॒ ವಾಙ್‌ ಮೇ॒ ಮಧು॑ಮ॒ದ್‌ ದುಹಾಂ᳚ |

ಆವೃ॑ದ್ಧಮ॒ಹಮ॒ಸೌ ಸೂರ್‍ಯೋ॒ ಬ್ರಹ್ಮ॑ಣಾ॒ನಿ ಸ್ಥಃ॑ ಶ್ರು॒ತಂ ಮೇ॒ ಮಾ ಪ್ರ ಹಾ᳚ಸೀಃ ||5||[ವ:೧]

ಮೇ॒ಧಾಂ ದೇ॒ವೀಂ ಮನ॑ಸಾ॒ ರೇಜ॑ಮಾನಾಂ ಗಂಧ॒ರ್‍ವಜು॑ಷ್ಟಾಂ॒ ಪ್ರತಿ॑ ನೋ ಜುಷಸ್ವ |

ಮಹ್ಯಂ॒ ಮೇಧಾಂ᳚ ವದ॒ ಮಹ್ಯಂ॒ ಶ್ರಿಯಂ᳚ ವದ ಮೇಧಾ॒ವೀ ಭೂ᳚ಯಾಸಮ॒ಜರಾ᳚ಜರಿ॒ಷ್ಣು ||6||

ಸದ॑ಸ॒ಸ್ಪತಿ॒ಮದ್ಭು॑ತಂ ಪ್ರಿ॒ಯಮಿಂದ್ರ॑ಸ್ಯ॒ ಕಾಮ್ಯಂ᳚ |

ಸ॒ನಿಂ ಮೇ॒ಧಾಮ॑ಯಾಸಿಷಂ ||7||

ಯಾಂ ಮೇ॒ಧಾಂ ದೇ॒ವಗ॑ಣಾಃ ಪಿ॒ತರ॑ಶ್ಚೋ॒ಪಾಸ॑ತೇ |

ತಯಾ॒ ಮಾಮದ್ಯಮೇ॒ಧಯಾ᳚ಽಗ್ನೇ ಮೇಧಾ॒ವಿನಂ᳚ ಕುರು ||8||

ಮೇಧಾ॒ವ್ಯ೧॑(ಅ॒)ಹಂ ಸು॒ಮನಾಃ᳚ ಸು॒ಪ್ರತೀ᳚ಕಃ ಶ್ರ॒ದ್ಧಾಮ॑ನಾಃ ಸ॒ತ್ಯಮ॑ತಿಃ ಸು॒ಶೇವಃ॑ |

ಮ॒ಹಾ॒ಯ॒ಶಾ ಧಾ॒ರಯಿಷ್ಣುಃ॑ ಪ್ರವ॒ಕ್ತಾ ಭೂ॒ಯಾಸ॑ಮಸ್ಮೈ ಶ॒ರಯಾ᳚ ಪ್ರಯೋ॒ಗೇ ||9||

ನಾ॒ಶಾ॒ಯಿ॒ತ್ರೀ ಪ॑ಲಾಶ॒ಸ್ಯಾರುಷ॑ಸೌ ಪಥಿ॒ಕಾಮ॑ಸು |

ಅಥೋ᳚ ತ॒ತಸ್ಯ॒ ಯಕ್ಷ್ಮಾ᳚ಣ॒ಮಪಾಪಾ᳚ ರೋಗ॒ನಾಶಿ॑ನೀ ||10||

ಬ್ರ॒ಹ್ಮ॒ವೃ॒ಕ್ಷ ಪ॑ಲಾಶ॒ ತ್ವಂ ಶ್ರ॒ದ್ಧಾಂ ಮೇ᳚ಧಾಂ ಚ॒ ದೇಹಿ॑ ಮೇ |

ವೃ॒ಕ್ಷಾ॒ಧಿ॒ಪ ನ॑ಮಸ್ತೇ॒ಽಸ್ತು ಅ॒ತ್ರ ತ್ವಂ᳚ ಸನ್ನಿ॒ಧೌ ಭ॒ವ ||11||[ವ:೨]

[23] [ಋಗ್ವೇದ ಮಂಡಲ ೧೦, ೧೬೧ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೮, ೧೨ ವರ್ಗಾನಂತರಂ]
ಊರ್ಧ್ವರೇಖಾ ಪ್ರ ದಹಂತೇ ವಿಷ್ಣುರಿಮಮಿಂದ್ರಾಗ್ನೀ, ಅಮೃತಂ ಜುಷೇತಾಂ |

ಮಹ್ಯಂ ದಧಾನಾ, ಉಪ ದೀರ್ಘಮಾಯುರಸ್ಮೇ ಧತ್ತಂ ಪುರುಭುಜಾ ಪುರಂಧಿಃ ||1||

[24] [ಋಗ್ವೇದ ಮಂಡಲ ೧೦, ೧೬೬ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೮, ೨೪ ವರ್ಗಾನಂತರಂ]
ಯೇನೇ॒ದಂ ಭೂ॒ತಂ ಭುವ॑ನಂ ಭವಿ॒ಷ್ಯತ್‌ ಪರಿ॑ ಗೃಹೀತಮ॒ಮೃತೇ᳚ನ॒ ಸರ್‍ವಂ᳚ |

ಯೇನ॑ ಯ॒ಜ್ಞಸ್ತಾ॒ಯತೇ ಸ॒ಪ್ತಹೋ᳚ತಾ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||1||

ಯೇನ॒ ಕರ್ಮಾ᳚ಣ್ಯ॒ಪಸೋ᳚ ಮನೀ॒ಷಿಣೋ᳚ ಯ॒ಜ್ಞೇ ಕೃ॒ಣ್ವಂತಿ॑ ವಿ॒ದಥೇ᳚ಷು॒ ಧೀರಾಃ᳚ |

ಯದ॑ಪೂ॒ರ್‍ವಂ ಯ॒ಕ್ಷಮಂ॒ತಃ ಪ್ರ॒ಜಾನಾಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||2||

ಯಜ್ಜಾಗ್ರ॑ತೋ ದೂ॒ರಮು॒ದೈತಿ॒ ದೈವಂ॒ ತದು॑ ಸು॒ಪ್ತಸ್ಯ॒ ತಥೈ॒ವೇತಿ॑ |

ದೂ॒ರಂ॒ಗ॒ಮಂ ಜ್ಯೋತಿ॑ಷಾಂ॒ ಜ್ಯೋತಿ॒ರೇಕಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||3||

ಯತ್‌ ಪ್ರ॒ಜ್ಞಾನ॑ಮು॒ತ ಚೇತೋ॒ ಧೃತಿ॑ಶ್ಚ॒ ಯಜ್ಜ್ಯೋತಿ॑ರಂ॒ತರ॒ಮೃತಂ᳚ ಪ್ರ॒ಜಾಸು॑ |

ಯಸ್ಮಾ॒ನ್ನ ಋ॒ತೇ ಕಿಂಚ॒ನ ಕರ್ಮ॑ ಕ್ರಿ॒ಯತೇ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||4||

ಯಸ್ಮಿ॒ನ್ನೃಚಃ॒ ಸಾಮ॒ ಯಜೂಂ᳚ಷಿ॒ ಯಸ್ಮಿ॒ನ್ ಪ್ರತಿ॑ಷ್ಠಿತಾ ರಥ॒ನಾಭಾವಿ॑ವಾ॒ರಾಃ |

ಯಸ್ಮಿಂ᳚ಶ್ಚಿ॒ತ್ತಂ ಸರ್‍ವ॒ಮೋತಂ᳚ ಪ್ರ॒ಜಾನಾಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||5||

ಸು॒ಷಾ॒ರ॒ಥಿರಶ್ವಾ᳚ನಿವ॒ ಯನ್ಮ॑ನು॒ಷ್ಯಾ᳚ನ್‌ ನೇನೀ॒ಯತೇ॒ಽಭಿಶು॑ಭಿರ್‌ವಾ॒ಜಿನ॑ ಇವ |

ಹೃತ್‌ಪ್ರತಿ॑ಷ್ಠಂ॒ ಯದ॑ಜಿ॒ರಂ ಯವಿ॑ಷ್ಠಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||6||[ವ:೧]

ಯೇ ಪಂಚ॑ ಪಂಚಾ॒ಶತಃ॑ ಶ॒ತಂ ಚ॑ ಸ॒ಹಸ್ರಂ᳚ ಚ ನಿ॒ಯುತಂ᳚ ಚಾರ್ಬು॒ದಂ ಚ॑ |

ತೇ ಯ॑ಜ್ಞಚಿ॒ತ್ತೇಷ್ಟ॒ಕಾಟಂ॒ ಶರೀ᳚ರಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||7||

ವೇದಾ॒ಹಮೇ॒ತಂ ಪುರು॑ಷಂ ಮ॒ಹಾಂತ॑ ಮಾದಿ॒ತ್ಯವ᳚ರ್ಣಂ॒ ತಮ॑ಸಃ॒ ಪರ॑ಸ್ತಾತ್ |

ತಸ್ಯ॒ ಯೋನಿಂ॒ ಪರಿ॑ಪಶ್ಯಂತಿ॒ ಧೀರಾ॒ಸ್ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||8||

ಯೇನ॒ ಕರ್ಮಾ᳚ಣಿ॒ ಪ್ರಚ॑ರಂತಿ॒ ಧೀರಾ॒ ವಿಪ್ರಾ᳚ ವಾ॒ಚಾ ಮನ॑ಸಾ॒ ಕರ್ಮ॑ಣಾ ವಾ |

ಯತ್‌ ಸ್ವಾಂ॒ ದಿಶ॑ಮನು॒ ಸಂಯಂ᳚ತಿ ಪ್ರಾ॒ಣಿನ॒ಸ್ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||9||

ಯೇ ಮೇ॒ ಮನೋ॒ ಹೃದ॑ಯಂ॒ ಯೇ ಚ॑ ದೇ॒ವಾ ಯೇ, ಅಂ॒ತರಿ॑ಕ್ಷಂ ಬಹು॒ಧಾ ಕ॒ಲ್ಪಯಂ᳚ತಿ |

ಯೇ ಶ್ರೋತ್ರಂ᳚ ಚ ಚ॒ಕ್ಷುಷೀ॒ ಸಂಚ॑ರಂತಿ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||10||

ಯಸ್ಯೇ॒ದಂ ಧೀರಾಃ᳚ ಪು॒ನಂತಿ॑ ಕ॒ವಯೋ᳚ ಬ್ರ॒ಹ್ಮಾಣ॑ಮೇ॒ತಂ ವ್ಯಾವೃ॑ಣುತ॒ ಇಂದುಂ᳚ |

ಸ್ಥಾವ॒ರಂ ಜಂಗ॑ಮಂ ಚ॒ ದ್ಯೌರಾ᳚ಕಾ॒ಶಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||11||[ವ:೨]

ಯೇನ॒ ದ್ಯೌರು॒ಗ್ರಾ ಪೃ॑ಥಿ॒ವೀ ಚಾಂ॒ತರಿ॑ಕ್ಷಂ॒ ಯೇನ॒ ಪರ್‍ವ॑ತಾಃ ಪ್ರ॒ದಿಶೋ॒ ದಿಶ॑ಶ್ಚ |

ಯೇನೇ॒ದಂ ಸರ್‍ವಂ᳚ ಜಗ॒ದ್ವ್ಯಾಪ್ತಂ᳚ ಪ್ರ॒ಜಾನ॒ತ್‌ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||12||

ಅವ್ಯ॑ಕ್ತಂ॒ ಚಾಪ್ರ॑ಮೇಯಂ॒ ಚ ವ್ಯ॒ಕ್ತಾವ್ಯ॑ಕ್ತಪ॒ರಂ ಶಿ॑ವಂ |

ಸೂಕ್ಷ್ಮಾ᳚ತ್‌ ಸೂ॒ಕ್ಷ್ಮತ॑ರಂ ಜ್ಞೇ॒ಯಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||13||

ಕೈ॒ಲಾಸ॒ಶಿಖ॑ರೇ ರ॒ಮ್ಯೇ ಶಂ॒ಕರ॑ಸ್ಯ ಗೃ॒ಹಾಲ॑ಯಂ |

ದೇ॒ವತಾ॒ಸ್ತತ್‌ ಪ್ರ॑ಮೋದಂ॒ತೇ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||14||

ಆ॒ದಿ॒ತ್ಯವ᳚ರ್ಣಂ॒ ತಪ॑ಸಾ ಜ್ವಲಂ॒ತಂ ಯತ್‌ ಪಶ್ಯ॑ಸಿ॒ ಗುಹಾ᳚ಸು॒ ಜಾಯ॑ಮಾನಃ |

ಶಿ॒ವರೂ॒ಪಂ ಶಿ॒ವಮು॒ದಿತಂ ಶಿ॒ವಾಲ॑ಯಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||15||

ಯೇನೇ॒ದಂ ಸರ್‍ವಂ॒ ಜಗ॑ತೋ ಬ॒ಭೂವ॒ ಯದ್ದೇ॒ವಾ, ಅಪಿ॑ ಮಹ॒ತೋ ಜಾ॒ತವೇ᳚ದಾಃ |

ಯದೇ॒ವಾಗ್ರ್ಯಂ॒ ತಪ॑ಸೋ॒ ಜ್ಯೋತಿ॒ರೇಕಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||16||[ವ:೩]

ಗೋಭಿ॑ರ್ಜು॒ಷ್ಟೋ ಧ॑ನೇನ ಹ್ಯಾ॒ಯುಷಾ᳚ ಚ ಬ॒ಲೇನ॑ ಚ |

ಪ್ರ॒ಜಯಾ᳚ ಪ॒ಶುಭಿಃ॑ ಪುಷ್ಕರಾ॒ರ್ಧಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||17||

ಯೋಽಸೌ᳚ ಸ॒ರ್‍ವೇಷು॑ ವೇದೇ॒ಷು ಪ॒ಠ್ಯತೇ᳚ಽನದ॒ ಈಶ್ವ॑ರಃ |

ಅಕಾ᳚ರ್ಯೋ॒ ನಿರ್‍ವ್ರ॑ಣೋ ಹ್ಯಾ॒ತ್ಮಾ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||18||

ಯೋ ವೇದಾ᳚ದಿಷು॒ ಗಾಯ॒ತ್ರೀ ಸ॒ರ್‍ವವ್ಯಾ᳚ಪೀ ಮ॒ಹೇಶ್ವ॑ರಃ |

ತದು॑ಕ್ತಂ॒ ಚ ಯ॑ದಾ ಜ್ಞೇ॒ಯಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||19||

ಪ್ರಯತ॒ಪ್ರಾಣ॑ ಓಂಕಾ॒ರಂ ಪ್ರ॒ಣವಂ᳚ ಚ ಮ॒ಹೇಶ್ವ॑ರಂ |

ಯಃ ಸರ್‍ವಂ॒ ಯಸ್ಯ॑ ಚಿತ್‌ ಸ॒ರ್‍ವಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||20||

ಯೋ ವೈ᳚ ವೇ॒ದ ಮ॑ಹಾದೇ॒ವಂ ಪ್ರ॒ಣವಂ᳚ ಪುರು॒ಷೋತ್ತ॑ಮಂ |

ಓಂ॒ಕಾರಂ॒ ಪರ॑ಮಾತ್ಮಾ॒ನಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||21||[ವ:೪]

ಓಂ॒ಕಾರಂ॒ ಚ॑ತುರ್ಭು॒ಜಂ ಲೋ॒ಕನಾ᳚ಥಂ ನಾರಾಯಣಂ |

ಸರ್‍ವ॑ಸ್ಥಿ॒ತಂ ಸ᳚ರ್ವಗ॒ತಂ ಸರ್‍ವ᳚ವ್ಯಾ॒ಪ್ತಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||22||

ತ॒ತ್‌ ಪರಾ᳚ತ್‌ ಪರ॒ತೋ ಬ್ರ॒ಹ್ಮಾ ತ॒ತ್‌ ಪರಾ᳚ತ್‌ ಪರ॒ತೋ ಹರಿಃ॑ |

ಪರಾ᳚ತ್‌ ಪ॒ರತ॑ರಂ ಜ್ಞಾ॒ನಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||23||

ಯ ಇ॒ದಂ ಶಿವ॑ಸಂಕ॒ಲ್ಪಂ ಸ॒ದಾಧೀ᳚ಯಂತಿ॒ ಬ್ರಾಹ್ಮ॑ಣಾಃ |

ತೇ ಪರಂ॒ ಮೋಕ್ಷ॑ಮಾಪ್ಸ್ಯಂ॒ತಿ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||24||

ಅಸ್ತಿ॒ ನಾಸ್ತಿ॑ ಶಯಿ॒ತ್ವಾ ಸರ್‍ವ॑ಮಿ॒ದಂ ನಾಸ್ತಿ॒ ಪುನ॒ಸ್ತಥೈ᳚ವ ದೃ॒ಷ್ಟಂ ಧ್ರು॒ವಂ |

ಅಸ್ತಿ॒ ನಾಸ್ತಿ॑ ಹಿ॒ತಂ ಮ॑ಧ್ಯ॒ಮಂ ಪ॒ದಂ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||25||

ಅಸ್ತಿ॒ ನಾಸ್ತಿ॑ ವಿಪ॒ರೀತೋ᳚ ಪ್ರ॒ವಾದೋ᳚ ಽಸ್ತಿ॒ ನಾಸ್ತಿ॒ ಗುಹ್ಯಂ॒ ವ ಇ॒ದಂ ಸರ್‍ವಂ᳚ |

ಅಸ್ತಿ॒ ನಾಸ್ತಿ॑ ಪರಾ॒ತ್‌ ಪರೋ᳚ ಯತ್‌ ಪರಂ॒ ತನ್ಮೇ॒ ಮನಃ॑ ಶಿ॒ವಸಂ᳚ಕ॒ಲ್ಪಮ॑ಸ್ತು ||26||[ವ:೫]

[25] [ಋಗ್ವೇದ ಮಂಡಲ ೧೦, ೧೮೪ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೮, ೪೨ ವರ್ಗಾನಂತರಂ]
ನೇಜ॑ಮೇಷ॒ ಪರಾ᳚ ಪತ॒ ಸುಪು॑ತ್ರಃ॒ ಪುನ॒ರಾ ಪ॑ತ |

ಅ॒ಸ್ಯೈ ಮೇ᳚ ಪು॒ತ್ರಕಾ᳚ಮಾಯೈ॒ ಗರ್ಭ॒ಮಾ ಧೇ᳚ಹಿ॒ ಯಃ ಪುಮಾ॑ನ್ ||1||

ಯಥೇ॒ಯಂ ಪೃ॑ಥಿ॒ವೀ ಮ॒ಹ್ಯ್ಯುತ್ತಾ॒ನಾ ಗರ್ಭ॑ಮಾದ॒ಧೇ |

ಏ॒ವಂ ತಂ ಗರ್ಭ॒ಮಾ ಧೇ᳚ಹಿ ದಶ॒ಮೇ ಮಾ॒ಸಿ ಸೂತ॑ವೇ ||2||

ವಿಷ್ಣೋಃ॒ ಶ್ರೇಷ್ಠೇ᳚ನ ರೂ॒ಪೇಣಾ॒ಽಸ್ಯಾಂ ನಾರ್‍ಯಾಂ᳚ ಗವೀ॒ನ್ಯಾಂ |

ಪುಮಾಂ᳚ಸಂ ಪು॒ತ್ರಾನಾ ಧೇ᳚ಹಿ ದಶ॒ಮೇ ಮಾ॒ಸಿ ಸೂತ॑ವೇ ||3||

[26] [ಋಗ್ವೇದ ಮಂಡಲ ೧೦, ೧೮೭ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೮, ೪೫ ವರ್ಗಾನಂತರಂ]
ಅನೀ᳚ಕವಂತಮೂತಯೇ॒ಽಗ್ನಿಂ ಗೀ॒ರ್ಭಿರ್ಹ॑ವಾಮಹೇ |

ಸ ನಃ॑ ಪರ್ಷ॒ದತಿ॒ ದ್ವಿಷಃ॑ ||1||

[27] [ಋಗ್ವೇದ ಮಂಡಲ ೧೦, ೧೯೧ ಸೂಕ್ತಸ್ಯಾನಂತರಂ][ಋಗ್ವೇದ ಅಷ್ಟಕ ೮, ಅಧ್ಯಾಯ ೮, ೪೯ ವರ್ಗಾನಂತರಂ]
ಸಂ॒ಜ್ಞಾನ॑ಮುಶನಾ᳚ವದತ್‌ ಸಂ॒ಜ್ಞಾನಂ॒ ವರು॑ಣೋಽವದತ್ |

ಸಂ॒ಜ್ಞಾನ॒ಮಿಂದ್ರ॑ಶ್ಚಾ॒ಗ್ನಿಶ್ಚ॑ ಸಂ॒ಜ್ಞಾನಂ᳚ ಸವಿ॒ತಾವ॑ದತ್ ||1||

ಸಂ॒ಜ್ಞಾನಂ᳚ ವಃ ಸ್ವೇಭ್ಯಃ॑ ಸಂ॒ಜ್ಞಾನ॒ಮರ॑ಣೇಭ್ಯಃ |

ಸಂ॒ಜ್ಞಾನ॑ಮ॒ಶ್ವಿನಾ᳚ ಯು॒ವ ಮಿ॒ಹಾಸ್ಮಾ᳚ಸು॒ ನಿ ಯ॑ಚ್ಛತಾಂ ||2||

ಯತ್‌ ಕ॒ಕ್ಷೀವಾಂ᳚ ಸಂ॒ವನ॑ನಂ ಪು॒ತ್ರೋ, ಅಂಗಿ॑ರಸಾಂ॒ ಭವೇ᳚ತ್ |

ತೇನ॑ ನೋಽದ್ಯ॒ ವಿಶ್ವೇ᳚ ದೇ॒ವಾಃ ಸಂ ಪ್ರಿ॒ಯಾಂ ಸಮ॑ಜೀಜನನ್ ||3||

ಸಂ ವೋ॒ ಮನಾಂ᳚ಸಿ ಜಾನತಾಂ ಸ॒ಮಾಕೂ᳚ತಿ॒ರ್ಮನಾ᳚ಮಸಿ |

ಅ॒ಸೌ ಯೋ ವಿಮ॑ನಾ ಮ॒ನಃ ಸಂ ಸ॒ಮಾವ॑ರ್‍ತಯಾಮಸಿ ||4||

ನೈ॒ರ್ಹ॒ಸ್ತ್ಯಂ ಸೇ᳚ನಾ॒ದರ॑ಣಂ॒ ಪರಿ॑ ವರ್‍ತ್ಮೇ᳚ತು॒ ಯದ್ಧ॒ವಿಃ |

ತೇನಾ᳚ಮಿತ್ರಾ॒ಣಾಂ ಬಾ॒ಹೂನ್‌ ಹ॒ವಿಷಾ᳚ ಶೋಷಯಾಮಸಿ ||5||

ಪರಿ॒ವರ್‍ತ್ಮಾ᳚ನ್ಯೇಷಾ॒ಮಿಂದ್ರಃ॑ ಪೂ॒ಷಾ ಚ॒ ಸಸ್ರ॑ತುಃ |

ತೇಷಾಂ᳚ ವೋ, ಅ॒ಗ್ನಿದ॑ಗ್ಧಾನಾಮ॒ಗ್ನಿಮೂ᳚ಳ್ಹಾನಾ॒ ಮಿಂದ್ರೋ᳚ ಹಂತು ವರಂ᳚ವರಂ ||6||

ಐಷು॑ ನಹ್ಯವೃಷಾಜಿ॒ನಂ ಹ॑ರಿ॒ಣಸ್ಯ॒ ಧಿಯಂ᳚ ಯಥಾ |

ಪರಾಁ᳚, ಅ॒ಮಿತ್ರಾಁ᳚, ಐಷ ತ್ವ॒ರ್‍ವಾಚೀ᳚ ಗೌರು॒ಪಾಜ॑ತು ||7||

ಪ್ರಾಧ್ವ॒ರಾಣಾಂ᳚ ಪತೇ ವಸೋ॒ ಹೋತ॒ರ್‍ವರೇ᳚ಣ್ಯಕ್ರತೋ |

ತುಭ್ಯಂ᳚ ಗಾಯ॒ತ್ರಮೃ॑ಚ್ಯತೇ ||8||

ಗೋಕಾ᳚ಮೋ॒, ಅನ್ನ॑ಕಾಮಃ ಪ್ರ॒ಜಾಕಾ᳚ಮ ಉ॒ತ ಕ॑ಶ್ಯಪಃ |

ಭೂ॒ತಂ ಭ॒ವಿಷ್ಯ॒ತ್‌ ಪ್ರಸ್ತೌ᳚ತಿ ಸ॒ಹ ಬ್ರ᳚ಹ್ಮೈಕ॒ಮಕ್ಷ॑ರಂ ಬ॒ಹುಬ್ರ᳚ಹ್ಮೈಕ॒ಮಕ್ಷ॑ರಂ ||9||

ಯದ॒ಕ್ಷರಂ᳚ ಭೂತ॒ಕೃತಂ॒ ವಿಶ್ವೇ᳚ದೇವಾ, ಉ॒ಪಾಸ॑ತೇ |

ಮಹ॑ ಋಷಿ॒ಮಸ್ಯ॑ ಗೋಪ್ತಾ॒ರಂ ಜ॒ಮದ॑ಗ್ನಿ॒ರಕು᳚ರ್ವತಂ ||10||

ಜ॒ಮದ॑ಗ್ನಿರಾಪ್ಯಾಯತೇ॒ ಛಂದೋ᳚ಭಿಶ್ಚತು॒ರುತ್ತ॑ರೈಃ |

ರಾಜಾ॒ ಸೋಮ॑ಸ್ಯ ಭ॒ಕ್ಷೇಣ॒ ಬ್ರಹ್ಮ॑ಣಾ ವೀ॒ರ್‍ಯಾ᳚ವತಾ ||11||

ಶಿ॒ವಾ ನಃ॑ ಪ್ರದಿಶೋ॒ ದಿಶಃ॑ ಸ॒ತ್ಯಾ ನಃ॑ ಪ್ರದಿಶೋ॒ ದಿಶಃ॑ |

ಅ॒ಜೋ ಯತ್‌ ತೇಜೋ॒ ದದೃ॑ಶ್ರೇ ಶು॒ಕ್ರಂ ಜ್ಯೋತಿಃ॒ ಪರೋ॒ ಗುಹಾ᳚ ||12||

ಯದೃಷಿಃ॒ ಕಶ್ಯ॑ಪಃ ಸ್ತೌ॒ತಿ ಸ॒ತ್ಯಂ ಬ್ರ᳚ಹ್ಮ ಚರಾಚ॒ರಂ ಧ್ರು॒ವಂ ಬ್ರ᳚ಹ್ಮ ಚರಾಚ॒ರಂ |

ತ್ರ್ಯಾ॒ಯು॒ಷಂ ಜ॒ಮದ॑ಗ್ನೇಃ॒ ಕಶ್ಯ॑ಪಸ್ಯ ತ್ರ್ಯಾಯು॒ಷಮ॒ಽಗಸ್ತ್ಯ॑ಸ್ಯ ತ್ರ್ಯಾಯು॒ಷಂ ||13||

ಯದ್ದೇ॒ವಾನಾಂ᳚ ತ್ರ್ಯಾಯು॒ಷಂ ತನ್ಮೇ॒, ಅಸ್ತು॑ ತ್ರ್ಯಾಯು॒ಷಂ ಸರ್‍ವ॑ಮಸ್ತು ಶತಾಯು॒ಷಂ ಬ॒ಲಾಯು॑ಷಂ ||14||
ತಚ್ಛಂ॒ಯೋರಾ ವೃ॑ಣೀಮಹೇ ಗಾ॒ತುಂ ಯ॒ಜ್ಞಾಯ॑ ಗಾ॒ತುಂ ಯ॒ಜ್ಞಪ॑ತಯೇ |

ದೈವೀ᳚ ಸ್ವ॒ಸ್ತಿರ॑ಸ್ತು ನಃ ಸ್ವ॒ಸ್ತಿರ್ಮಾನು॑ಷೇಭ್ಯಃ |

ಊ॒ರ್ಧ್ವಂ ಜಿ॑ಗಾತು ಭೇಷ॒ಜಂ ಶಂ ನೋ᳚, ಅಸ್ತು ದ್ವಿ॒ಪದೇ॒ ಶಂ ಚತು॑ಷ್ಪದೇ ||15||